Teaching in the ThM at PRTS

Posted on by Prof. Gerrit

Puritan Reformed Theological Seminary | Grand Rapids MIThis week I will be lecturing as a visiting professor in the Master of Theology (ThM) programme of Puritan Reformed Theological Seminary (PRTS) for students all over Africa. PRTS is a well-known Reformed seminary situated in Grand Rapids, Michigan, USA.

I will be teaching 20 lectures on The History and Preservation of the Biblical Text, a course that examines the transmission and preservation of the text of the Old and New Testaments from the Masoretes and the Dead Sea Scrolls to modern translations. We will also study the history of the Reformed doctrine of Scripture. The course engages primary sources from the ancient world, the early church, the Reformation, and Reformed orthodoxy through modern scholarship.

This course aims to equip the next generation of pastors, theologians, and Christian leaders to handle the Word of God faithfully and with scholarly care.

I am grateful for this opportunity to contribute to international theological education and to serve within the wider Reformed academic community.

Pray with us that the Lord will bless these lectures, grant the students understanding and wisdom in their study of Scripture, and equip them to serve Christ and His church faithfully.

Bybelskoling: Kinderdoop of grootdoop?

Posted on by Prof. Gerrit

Is jou kinderdoop ‘n ware doop? Wat is die verskil tussen die doop as teken van bekering en die doop as teken van God se verbond?

Wat is die verskil tussen die grootdoop en die kinderdoop en wat leer die Bybel?

The Apostolic Fathers’ understanding of divine speech

Posted on by Prof. Gerrit

Hierdie studie het ontstaan uit my voorbereiding vir ’n kursus wat ek in Oktober vanjaar aanbied vir die Meestersgraad-studente aan die Puritan Reformed Theological Seminary (PRTS) oor die geskiedenis en bewaring van die Bybelse teks. Terwyl ek die oordrag en ontvangs van die Bybelse teks in die vroeë kerk nagevors het met die oog op die lesings, het die aanhalingspraktyke van die Apostoliese Vaders my veral opgeval. Ek het opgemerk dat hulle Skrifaanhalings dikwels met werkwoorde van “spreek” in die teenwoordige tyd, soos λέγει, φησίν en λαλεῖ, ingelei het, terwyl die perfektum passief γέγραπται die mees voor-die-hand-liggende woord sou wees.

Hierdie waarneming het aanleiding gegee tot ’n nadere ondersoek na die vraag of die grammatikale vorm van hulle Skrifaanhalings ’n breër verstaan van die Skrif weerspieël het, naamlik as goddelike spraak wat in die hede aan die kerk gerig word. Hierdie artikel poog om die verskynsel binne sy historiese, literêre en teologiese konteks te ondersoek.

 

ABSTRACT

The Apostolic Fathers frequently introduce scriptural citations with present-tense verbs of speaking (λέγει, φησίν, λαλεῖ) alongside the perfect verb γέγραπται. They locate the reception of these texts in the gathered assembly, identify the speaker with the Word who proceeds from the silence of the old covenant, and treat the Spirit’s activity as continuing in the church’s reading and proclamation. Taken together, these habits suggest that Scripture functions for them less as a written record to be consulted than as divine address that is heard in the present. This study examines the relevant texts in their historical setting and then considers what light this early approach to divine speech may shed on the reformed understanding of Scripture as the viva vox Dei.

You can read the article on Academia.edu or Researchgate

Begrafnisse in die gereformeerde tradisie

Posted on by Prof. Gerrit

Ons moet versigtig wees wanneer ons begrafnisse reël, dat die geleentheid nie oor die persoon wat dood is gaan, eerder as die troos vir die wat agterbly nie. As jy al by ‘n begrafnis was, sou jy seker al beleef het dat party mense aandring dat die kis voor die kansel moet staan, hoe die lewensverhaal van die afgestorwene vertel word, verskillende sprekers aan die woord is wat ‘n afskeidsboodskap bring, soms is daar foto’s wat vertoon word en ‘n “gunsteling liedjie” wat gespeel word, party mense wil by die graf helium-ballonne met briefies loslaat, of wit duiwe of honderde skoenlappers vrylaat, in die kis die oorledene se “gunsteling-dinge” sit, soos sy/haar selfoon, sigarette, ‘n bottel brandewyn, ‘n visstok, of ‘n PlayStation. Gaste word versoek om nie swart aan te trek nie, maar eerder vrolike kleure en sandale, sondrag of kortbroeke. Na die tyd word ‘n piekniek in die park ter viering van die lewe van die afgestorwene beplan. Continue reading →

Die teologiese motief van burgerskap en stryd in Filippense

Posted on by Prof. Gerrit

Hierdie artikel ondersoek die teologiese motief van burgerskap en stryd in die Brief aan die Filippense. Teen die agtergrond van Filippi as ’n Romeinse kolonie word aangetoon dat Paulus doelbewus gebruik maak van bekende burgerlike, militêre en atletiese taal om die identiteit en roeping van die Christelike gemeente te beskryf. Die sentrale argument is dat burgerskap en stryd in Filippense as ’n geïntegreerde teologiese motief funksioneer. Die gebruik van πολιτεύεσθε in Filippense 1:27, στήκετε en συναθλοῦντες in 1:27, die gebruik van ἀγών in 1:30 en πολίτευμα in 3:20 vorm saam ’n deurlopende beeld van gelowiges as burgers van ’n hemelse koninkryk wat binne ’n aardse kolonie leef. Hierdie burgerskap bepaal hulle lojaliteit, onderlinge eenheid, volharding en openbare getuienis.

Filippense 2:5-11 vorm die Christologiese sentrum van hierdie motief. Christus is die Modelburger van die hemelse koninkryk, wie se heerskappy deur selfvernedering, gehoorsaamheid en die kruis heen tot verhoging lei. Die Christelike stryd word gevolglik nie deur geweld gevoer nie, maar deur eensgesindheid, nederigheid, gehoorsaamheid, volharding, lyding en getrouheid aan Christus.

Die artikel toon verder aan hoe hierdie taal in die vroeë kerk voortgeleef het by onder andere Klemens van Rome, Ignatius van Antiochië, Tertullianus en Polukarpus.

Die gevolgtrekking is dat die burgerskaps- en strydmotief ’n belangrike sleutel bied tot die verstaan van die eenheid van Filippense en tot die kerk se identiteit en roeping binne die samelewing.

Lees die artikel hier: Academia.edu of hier: Researchgate.net 

Die doop van kinders van ouers wat kerklos geraak het

Posted on by Prof. Gerrit

Een van die moeilikste vrae wat ‘n kerkraad deesdae moet hanteer, is die geval van ‘n ouer wie se naam nog op die lidmaatregister staan, maar wat al jare lank nie meer die eredienste bywoon en onder die bediening van die Woord kom nie. En dan bel hulle die dominee of die kerkkantoor en vra dat hulle kind gedoop word. Soms word sulke mense selfs kwaad as hulle hoor dat die leraar eers met hulle ‘n gesprek wil hê oor die redes waarom hulle wil doop of oor hulle kerkbywoning. 

Hierdie artikel wil graag riglyne gee vir sulke gevalle. Hier gaan ons nie bespreek of die kinderdoop skriftuurlik is nie en ook nie of kinders van gelowige ouers gedoop moet word nie. Dit is reeds voorheen bespreek. Die vraag wat ons hier bespreek is om moontlike antwoorde te gee op die vraag of die verbond verdwyn wanneer mense uit die kerk verdwyn?

Lees die artikel hier.

In ‘n krip, maar nie in ‘n stal nie

Posted on by Prof. Gerrit

Ek het groot geword met die idee dat huise in die tyd van die Nuwe Testament ‘n onderste vlak in die huis of ‘n kamer gehad het waar die diere aangehou was. Ek het later in my studies besef dat dit nie so was nie. Dit sou binne die konsep van reinheid in die antieke wêreld totaal onaanvaarbaar wees en dit sou ook baie onhigiënies gewees het. Nou hoe moet ons dan die geboorte van Jesus in die stal in Bethlehem verstaan? Continue reading →

Sondag se preek begin in die week

Posted on by Prof. Gerrit

Praktiese wenke vir gemeentes vir Sondag se diens

Ons praat maklik oor die preek asof dit iets is wat van die predikant afhang. Ons vra vrae soos: Was dit ‘n goeie preek? Was dit te lank? Het hy die teks reg hanteer? Het die kinders verstaan? Dit is nie verkeerde vrae nie, en die Skrif vra dat gemeentelede moet toets wat gesê word.

Dit is egter opvallend hoe selde ons die ander helfte van die vraag vra, naamlik: Het ek reg geluister en was my aandag by die preek? Die Skrif behandel die “luister na die Woord” as ‘n vaardigheid wat aangeleer word en wat nie vanself kom nie. Die Here Jesus sê nie verniet “wie ‘n oor het” nie, maar Hy waarsku ook: “laat hom hoor wat die Gees aan die gemeentes sê” (Openbaring 2:7). “Hoor” en “luister” is werkwoorde: dit is iets wat jy doen, en meeste daarvan gebeur nie vanself nie.

Om dus die meeste uit Sondag se preek te kry, moet jy reeds in die week begin voorberei. Continue reading →

Die historiese betroubaarheid van Genesis 1-11: ‘n Gereformeerde perspektief

Posted on by Prof. Gerrit

Hierdie artikel ondersoek die historiese betroubaarheid van Genesis 1-11 vanuit ‘n Gereformeerde perspektief en argumenteer dat hierdie hoofstukke betroubare openbaring van God se dade in tyd en ruimte bied, en nie mites, teologiese simboliek of etiologiese volksverhale is nie. Die ondersoek begin by die literêre aard van die teks, waar die narratiewe formules en die geslagsregisters van Genesis 5 en 10 die vertelling in werklike tydsverloop anker, en verbind dit met die verstaan van Calvyn en Bavinck dat Genesis die begin van die verlossingsgeskiedenis is.

Vervolgens word die onderskeid tussen die Skrif se wie en waarom en die natuurwetenskap se hoe uiteengesit aan die hand van Kuyper se soewereiniteit in eie kring.

Die artikel volg daarna die ontstaan van die moderne paradigmas wat Genesis onder verdenking gebring het, naamlik Lyell se uniformisme, Darwin se evolusieteorie en die histories-kritiese metode van Wellhausen, en toon aan dat die verwerping van ‘n historiese Adam, sondvloed en Babel die argumentasie van Romeine 5, 1 Korintiërs 15, Matteus 24 en Hebreërs 11 van sy grondslag stroop.

Op wetenskaplike vlak word die tweede wet van termodinamika en Behe se onherleibare kompleksiteit aangewend as besware teen die evolusionêre voorveronderstelling van spontane vooruitgang, en word teïstiese evolusionisme as teologies onhoudbaar beoordeel. Ten opsigte van die ouderdom van die aarde word verskeie Skrifgetroue uitlegmoontlikhede erken, met die waarskuwing dat Skrifgesag nie met een uitlegtradisie vereenselwig moet word nie.

Die volledige artikel is beskikbaar by hierdie skakel en ook op op: Academia.edu

Kerkmusiek deur die eeue

Posted on by Prof. Gerrit

Wat sê die Bybel oor kerkmusiek?

In hierdie Bybelskoling ondersoek ons die oorsprong en doel van musiek in die erediens. Ons volg die ontwikkeling van die tabernakel na die tempel, kyk na Dawid se rol in die instelling van die Levitiese musiekbediening, en vra hoe die Nuwe Testament die kerk se sang en aanbidding rig.

Onderwerpe:

• Musiek in die Ou Testament

• Dawid en die tabernakel op Sion

• Kerkmusiek in die Nuwe Testament

• Die beginsel van aanbidding by kerkmusiek

• Die reformatore se standpunt oor kerkmusiek

• Praktiese implikasies vir die kerk vandag

Vroulikheid versus feminisme

Posted on by Prof. Gerrit

Een van die groot strydvrae van ons tyd handel oor identiteit. Die vraag van ons tyd het geword: “Wie is ek?” en “Wat dink ander van my, of my kultuur, of my taal, of my voorkeure” ens.? Hierdie soeke na identiteit raak elke aspek van die menslike bestaan, maar veral die vraag na manlikheid en vroulikheid. Wat beteken dit om ’n vrou te wees? Is vroulikheid iets wat deur God gegee word, of iets wat deur die individu gekies en self gevorm word?

Vir eeue was die Christelike antwoord relatief eenvoudig. Die mens is deur God geskape as man en vrou (Gen. 1:27), en hierdie onderskeid vorm deel van die skeppingsorde. In die afgelope eeu het hierdie eenvoudige Bybelse antwoord egter toenemend onder druk gekom deur die invloed van verskillende vorme van feminisme. Die gevolg is dat baie vroue vandag onseker is oor hul identiteit, hul roeping en hul plek in die wêreld. Continue reading →

Kerkgeboue, kansels, klokke en toga’s – waar kom dit vandaan en wat beteken dit?

Posted on by Prof. Gerrit

Geboue, kansels, klokke en toga’s is dikwels simbole van die kerk se geskiedenis en identiteit. Maar wat is hulle werklike plek in die lewe van die gemeente? In hierdie video ondersoek ons die oorsprong, betekenis en funksie van hierdie tradisies vanuit ‘n Bybelse en gereformeerde perspektief. Ons vra hoe die kerk die erfenis van die verlede kan waardeer sonder om die kern van die evangelie uit die oog te verloor. Sluit aan vir ‘n gesprek oor die verhouding tussen vorm en inhoud, tradisie en die Skrif, en die ware roeping van die kerk in die wêreld van vandag.

Die getal 6 in die Bybel

Posted on by Prof. Gerrit

In die vorige artikel oor getalle in die Bybel, het ons gekyk na die getal drie en gesien hoe die derde dag deur die hele Skrif die patroon volg van God se redding. In hierdie artikel kyk ons na die getal ses. Die getal ses het deur die eeue allerhande spekulasie uitgelok. Mense het dit op pouse, presidente, rekenaarstelsels en strepieskodes van toepassing gemaak. Die gereformeerde eksegese probeer om hierdie soort speurwerk te vermy en die Bybel te lees vir wat dit is, naamlik God se openbaring. Die Bybel is nie ‘n kodeboek nie. Die getalle in die Skrif is teologiese boodskappe, nie towerformules nie. Maar dat ses iets in die Bybel sê, en iets baie spesifiek, kan ons ook nie ontken nie. Die getal ses vertoon in Bybelse en buite-Bybelse tradisies ’n gelaaide betekenis.

Continue reading →

Die getal 3 in die Bybel

Posted on by Prof. Gerrit

Getalle in die Bybel: Die getal drie

Inleiding
Vanjaar het ek in die Pinkster-reeks gefokus op getalle wat herhaaldelik in die Skrif opduik en hulle simboliese betekenis. Ek het gefokus op drie, ses, sewe, twaalf, veertig en vyftig. Die doel is nie om die Bybel in ‘n kodeboek te verander, asof ons dit moet “ontsyfer” voor ons die Bybel verstaan nie. Getalle in die Skrif funksioneer eerder as wegwysers. Hulle is literêre tekens wat die leser help om die patroon van God se handelinge in die Skrif raak te sien. Ons leer dus die Skrif lees soos dit homself wil laat lees.

 

Die getal drie

Die getal drie staan voorop, want die hele Pinkster-gebeure rus op iets wat op ‘n derde dag plaasgevind het. Sonder die derde dag sou daar geen vyftigste dag wees nie. Sonder die opstanding sou die uitstorting van die Heilige Gees onnodig wees.

Drie dra in die Bybelse wêreld die betekenis van orde en volledigheid. Dit het ‘n begin, ‘n middel en ‘n einde. Dit is die kleinste getal wat ‘n patroon vorm. Een gebeurtenis kan terloops wees, twee kan nog lukraak wees, maar drie vestig ‘n patroon. Ons verstaan dit almal. Wanneer iets driemaal gebeur in ‘n verhaal, weet die leser dat iets beslissends op pad is.

Continue reading →

Hemelvaart: Christus aan die regterhand van die Vader

Posted on by Prof. Gerrit

Die betekenis van “sit aan die regterhand van die Vader”
Prof. G.D.S. Smit

Inleiding
Daar is ‘n gevaar dat die leer oor die hemelvaart van Christus in die prediking van die kerk as ‘n eindpunt beskou word: die opstanding is gevier, die verhaal oor die hemelvaart word vertel, en nou is Christus weg tot die wederkoms. Die hemelvaart is egter nie ‘n afskeid nie, maar ‘n troonsbestyging. Dit is die oomblik waarop die verheerlikte Middelaar die posisie inneem wat Hom van ewigheid af toekom, en vanwaar Hy aktief as Koning en met volmag van die Vader regeer oor alle dinge. Die klassieke belydenis is dat Hy sit aan die regterhand van die Vader, en dit verdien meer aandag as wat dit in die hedendaagse kerklike nadenke ontvang. Continue reading →

Kaalvoet voor God

Posted on by Prof. Gerrit

Wanneer Moses by die brandende doringbos kom in Eksodus 3, hoor hy hoe ‘n stem vir hom sê: “Trek jou skoene van jou voete af, want die plek waar jy op staan, is heilige grond” (Eks. 3:5). God openbaar daarmee iets van sy heiligheid, en terselfdertyd iets van die mens se nederige posisie voor Hom.

In die Skrif dra skoene ‘n simboliese betekenis. Skoene het te doen met besittings, ‘n uitdrukking van mag, is noodsaaklikheid vir reis, bewys status en het te doen met menslike selfstandigheid. Om jou skoene uit te trek voor God, beteken daarom dat jy jou eie aansprake laat vaar. Jy kom nie voor Hom as meester nie, maar as skepsel in afhanklikheid. Continue reading →

Moet Jesus se Naam vertaal word met Josua?

Posted on by Prof. Gerrit

In sommige kringe het daar ’n hernieude aandrang ontstaan om die Naam van Jesus as “Josua” of “Jashua” weer te gee in vertalings, veral met ’n beroep op die Hebreeuse vorm יְהוֹשֻׁעַ (Yehoshua). Hierdie benadering word dikwels aangebied as ’n herstel van sogenaamde “oorspronklike” Bybelse akkuraatheid. Tog berus hierdie argumentasie dikwels op ’n gebrekkige verstaan van taalontwikkeling, transliterasie, en, meer fundamenteel, van die teologiese aard van die Nuwe-Testamentiese openbaring self.

Continue reading →

‘n Evaluering van die inleidings op die Bybelboeke in die 2020-vertaling

Posted on by Prof. Gerrit

Opsomming:

Hierdie artikel bied ’n kritiese evaluering van die boekinleidings in die 2020-Afrikaanse Bybelvertaling (Die Bybel: Direkte Vertaling) vanuit ’n reformatoriese teologiese perspektief. Hoewel die vertaling self bedoel is om ‘n formele ekwivalente vertaling te wees wat die oorspronklike Hebreeuse, Aramese en Griekse tekste so noukeurig moontlik weergee, weerspieël die gepaardgaande inleidings ’n metodologiese benadering wat teologiese vrae oproep. Die artikel begin deur ’n reformatoriese Skrifbeskouing uiteen te sit. Teen hierdie agtergrond ondersoek ek die onderliggende aannames en metodes wat in die inleidings gebruik word, veral die invloed van die histories-kritiese metode, insluitend bronnekritiek, redaksiekritiek en teorieë oor literêre ontwikkeling. Die artikel voer aan dat hierdie benaderings hulle oorsprong het in metodologiese voorveronderstellings wat dikwels in spanning staan met die selfgetuienis van die Skrif en die getuienis van die Nuwe Testament. Verder word die breër teologiese implikasies van hierdie verskuiwing uitgelig, waaronder die verswakking van Skrifgesag en die herdefiniëring van Skrifopenbaring as ’n produk van historiese ontwikkeling.

 

Abstract:

This article offers a critical evaluation of the book introductions in the 2020 Afrikaans Bible translation (Die Bybel: Direkte Vertaling) from a Reformed theological perspective. While the translation itself aims at formal equivalence and remains closely aligned with the original Hebrew, Aramaic, and Greek texts, the accompanying introductions reflect a methodological approach that raises theological concerns. The analysis begins by outlining a Reformed doctrine of Scripture. Against this backdrop, the study examines the underlying assumptions and methods employed in the introductions, particularly the influence of the historical-critical method, including source criticism, redaction criticism, and theories of literary development. The article argues that these approaches are driven by methodological presuppositions that often stand in tension with the self-testimony of Scripture and the witness of the New Testament. Furthermore, it highlights the broader theological implications of this shift, including the weakening of scriptural authority and the redefinition of revelation as a product of historical development.

Die artikel is hier beskikbaar: https://www.academia.edu/165789918/Kritiese_evaluering_van_die_inleidings_op_die_2020_Bybelvertaling

Gebruike en gewoontes in Eksodus: God se Naam (Jahwe)

Posted on by Prof. Gerrit

Inleiding tot die boek Eksodus

Stel jou voor: dit is laat nag in Egipte. Dit is pikdonker en die straatjies is stil. In elke Israelitiese huis brand ‘n klein olielampie. Die reuk van gebraaide lamsvleis en ongesuurde roosterkoeke hang in die lug. Teen elke deurkosyn is bloed gesmeer met ‘n hisoptak. Almal eet haastig, met hulle skoene aan die voete, en ‘n staf in die hand. Hulle weet nie presies wat aan die kom is nie, maar dit was God se opdrag aan hulle deur Moses en daarom eet hulle vir die eerste maal die Pasga. Hulle weet iets groot is aan die gebeur. Hierdie aand sal hulle lewens vir altyd verdeel in die tyd voor die uittog en die tyd na die uittog uit Egipte.

Continue reading →

Is die opstanding wetenskap of wetenskap-fiksie?

Posted on by Prof. Gerrit

deur Prof. Gerrit Smit

Is die opstanding wetenskap of wetenskap-fiksie?

Paassondag konfronteer elke reg-denkende mens met ‘n historiese aanspraak wat moeilik is om te verduidelik: Jesus van Nasaret, wat op die Vrydag gekruisig is onder Pontius Pilatus, en werklik gesterf het, het op die derde dag liggaamlik uit die dood opgestaan. Deur al die eeue het die kerk dit verkondig en mense het nie gesukkel om dit te glo nie, omdat daar ‘n natuurlike aanvoeling was dat daar naas die sigbare dinge, ook ‘n onsigbare werklikheid bestaan.

Die skuif in denke oor die onsigbare werklikheid het nie oornag gebeur nie. Dit het stadig gegroei deur die tydperk van die Verligting (17de-18de eeu) en toe dramaties sigbaar geword in die Franse Revolusie (laat 18de eeu). Wat voorheen as ’n gegewe aanvaar is, naamlik dat God, engele en die geestelike wêreld werklik bestaan, was toenemend bevraagteken en uiteindelik vervang, sodat “wetenskap” mettertyd beskou was as “die dinge wat mens kan meet en sien”. Sedertdien word van die geesteswetenskappe as “sagte wetenskappe” gepraat en die natuurwetenskappe as “harde wetenskap”. Die probleem is egter dat sulke definisies ‘n fundamentele vertrekpunt neem dat slegs die tydelike dinge werklik is en die onsigbare dinge nie bestaan nie.

Continue reading →

Gee meer as wat jy neem

Posted on by Prof. Gerrit

Die mens staan in verhouding tot God, die skepping en die medemens.

Ons leef egter in ’n tyd waar mense eerder vra: Wat kry ek hieruit? en: Hoe help dit my?

Die Christelike godsdiens stel ’n ander vraag: Wat kan ek gee, omdat Christus sy lewe aan my gegee het? Die Bybel stel ‘n belangrike beginsel aan elke Christen in Handelinge 20:35 – “Ek het julle in alles getoon dat ons deur so te arbei die swakkes moet help en die woorde van die Here Jesus moet onthou, dat Hy gesê het: Dit is saliger om te gee as om te ontvang”. 

Hierdie week herdenk ons Paasfees. Dit vra van ons selfondersoek en ‘n persoonlike ontleding van die vraag: Gee ek meer as wat ek neem? Dit geld op al die terreine van ‘n mens se verhoudingsdriehoek.

Continue reading →

Gebruike en gewoontes in die Bybel: Genesis

Posted on by Prof. Gerrit

Ek werk tans aan ‘n nuwe publikasie. Dit handel oor “gebruike en gewoontes in die Bybel”. Ek deel graag so stuk-stuk van die gedagtes.

Die Bybel vertel nie net wat God gedoen het nie, maar wys ook hoe die mense van daardie tyd geleef het. Agter elke verhaal lê gebruike en gewoontes wat vir die eerste lesers vanselfsprekend was, maar vir ons dikwels vreemd voorkom. Wie hierdie gebruike verstaan, lees die Bybel met nuwe oë.

Hierdie reeks begin by die begin: Genesis. Hier, in die eerste boek van die Bybel, ontmoet ons gebruike rondom gasvryheid, die huwelik, erfporsies en die verbond. Dit help ons om te sien hoe God werk binne konkrete menslike omstandighede.

Lees deel 1 hier: Gebruike en gewoontes in Genesis

Kerkwees is bediening, nie geboue nie

Posted on by Prof. Gerrit

Hierdie artikel ondersoek ʼn toenemende tendens in Afrikaanse gemeentes waar finansiële oorwegings die instandhouding van infrastruktuur bo die aanstelling van predikante stel. Met verwysing na Bybelse beginsels, die belydenisskrifte en die praktyk, word aangevoer dat die Woordverkondiging, sakramentsbediening en tug, die onvervangbare kern van kerkwees uitmaak. Geboue help, maar Woordverkondiging is ononderhandelbaar. ʼn Gemeente wat ‘n leraar prysgee om ‘n pastorie te behou, ruil die lewe van die gemeente vir ‘n kis waarin die doodspykers reeds ingeslaan word.

Lees die artikel hier.

Die vere maak die voël – waarom dra ons klere?

Posted on by Prof. Gerrit

Jy trek soggens aan sonder om daaroor te dink. Tog sê jou klere reeds iets oor jou voor jy ’n woord kan praat.

Klere is nie maar net materiaal nie, daar is ‘n teologie in wat jy aantrek.

Naas kos, behoort klere tot die mees basiese menslike behoeftes. Dit beskerm die liggaam, dit bied privaatheid, en dit vorm deel van elke kultuur se sosiale uitdrukking.

In die Bybel word klere egter ook gekoppel aan identiteit, aan roeping, aan eer en soms selfs aan die geestelike toestand van ’n individu of ’n groep. Ons is nie maar net biologiese wesens wat uit koolstof, suurstof en waterstof bestaan nie. Wanneer die mens voor God verskyn, doen ons dit as iemand wat sy rol en plek in God se skeppingsorde op ‘n sigbare manier uitdruk, ook in wat jy aantrek.

In hierdie artikel, bespreek ek die belangrikste Bybelse voorbeelde van klere en toon aan hoe klere ’n teologiese boodskap dra. Dit herinner ons dat selfs eenvoudige uiterlike dinge ’n etiese en geestelike betekenis het wanneer dit onder God se heerskappy staan.

Continue reading →

Bybelvertaling deel 10: die vertaalteorie van die 2020-vertaling

Posted on by Prof. Gerrit

Die 2020 Afrikaanse Bybelvertaling se vertaalopdrag was om ’n goed verstaanbare, bronteksgeoriënteerde vertaling te skep wat geskik is vir eredienste, Bybelstudie en persoonlike gebruik. Die vertaling rus op twee ankerpunte, naamlik getrouheid aan die bronteks, maar moes steeds goeie Afrikaans wees. In hierdie deel bespreek ons die 2020-vertaling se vertaalteorie. Dis nie die doel van hierdie aanbieding om te debatteer of die vertaling geslaag het in sy oorspronklike opdrag nie. Die doel van die aanbieding is om te verduidelik watter vertrekpunte die 2020-vertaling geneem het en hoe dit verskil van die 1983-vertaling.

 

Die Teologie van gasvryheid

Posted on by Prof. Gerrit

Ons het die afgelope tyd in die Nuwe Testament klas ‘n lewendige gesprek gehad oor die tema: Gasvryheid in die Bybel. Dit het my weer herinner aan ‘n stuk wat ek so paar jaar terug geskryf het. Ek het besluit om die stuk af te stof en verder daaroor te dink. Wat jy hier kry, is verdere gedagtes oor ‘n tema wat ons dikwels in die Bybel raaklees, naamlik “die Teologie van gasvryheid”. Dit is ‘n tema waaroor Christene in ons tyd van individualisme, sosiale media, mense wat wegkruip agter skerms en onttrekking van die samelewing, meer moet dink. Ons leef in ‘n gevaarlike land, waar gasvryheid teenoor ‘n vreemdeling, jou lewe kan kos. Die gevolg daarvan is dat ons nie maklik iets goed doen aan vreemdes nie. Tog gee die Bybel vir ons ‘n opdrag om goed te doen aan ander mense, maar in besonder aan ons medegelowiges (Gal. 6:9-10).

Continue reading →

Ontologie: dood as poort na die lewe

Posted on by Prof. Gerrit

In die Maart 2026-uitgawe van die AP Kerk se amptelike blad, Die Boodskapper, het ek die hoofartikel geskryf met die titel: Ontologie: Dood as poort van die sigbare- na die onsigbare werklikheid.

In hierdie video, neem ek die hoofgedagtes daarvan en bespreek die vraag verder, deur te gesels oor die moeilike tema wat mense graag vermy, naamlik die dood as poort na die lewe in die Christelike beskouing van die werklikheid.

Bybelvertaling deel 9 – Hoofletters in die Messiaanse tekste van die 2020-vertaling

Posted on by Prof. Gerrit

In hierdie negende deel van die reeks oor Bybelvertaling kyk ons na die debat rondom hoof- en kleinletters in die Ou Testament en hoe dit in die verskillende uitgawes van die 2020-Bybelvertaling hanteer is. Ons vra ook: waarom is dit vir baie gelowiges belangrik? Wat sê dit oor ons verstaan van die verhouding tussen Ou en Nuwe Testament? En hoe raak ’n lettter ons hermeneutiek en uiteindelik ons belydenis?

Die teologie van blokketting-tegnologie

Posted on by Prof. Gerrit

Die AP Akademie bied die volgende Kortkursus aan:
Die teologie en praktyk van blokketting-tegnologie, met fokus op Bitcoin
Aanbieder: prof. Gerrit Smit
Departement Nuwe Testament | Publieke Teologie

Die ekonomie verander. Tegnologie verander. Die vraag is: hoe moet die kerk daaroor dink?

Blokketting-tegnologie en digitale geldstelsels, soos Bitcoin, beïnvloed reeds die wêreldekonomie op terreine wat vroeër ondenkbaar was. Inflasie, fiskale onsekerheid en toenemende sentralisering roep nuwe vrae op oor Christene se beskouing oor rentmeesterskap, mag, vertroue en verantwoordbaarheid. Hierdie kortkursus help jou om Skrifgetrou te dink oor die kerk se roeping en die Bybel se antwoorde op ekonomiese kwessies van die dag.

Continue reading →

TikTok Teologie

Posted on by Prof. Gerrit

Die afgelope jare, en veral sedert Covid, het ’n nuwe vorm van “Bybellees” posgevat – op selfone. Kort video’s, vinnige aanhalings en treffende Bybelverse word daagliks gedeel op sosiale media. Sommige is baie goed en aanvaarbaar, maar ‘n mens is dikwels verstom oor die vlakheid van die teologie in ander, wat soms met groot oortuiging en min konteks aangebied word. Hierdie verskynsel, wat ek “TikTok-teologie” wil noem, is ’n moderne hermeneutiese uitdaging. Aan die een kant kan mens dankbaar wees dat die Bybel wel aangehaal word, maar hóé dit aangehaal word, los van die konteks en watter verstaan daaraan gegee word, plaas ‘n groot vraagteken oor Skrifgesag. Om ’n teks buite konteks te lees, was nog altyd ’n vorm van inlees en nie uitleg nie, ongeag die vernuf om mense se aandag te trek.

Continue reading →

Korinthe en die kerk te midde van die kultuuroorlog

Posted on by Prof. Gerrit

‘n Kunstenaarsvoorstelling van die antieke stad Korinthe.

Korinthe neem ’n unieke plek in die Nuwe Testament in. Dit is een van die stede waarin die apostel Paulus meerderheid van sy tyd gewoon en gewerk het, en ook in besonder ‘n stad wat  vir die verspreiding van die evangelie baie sentraal was. Ons weet ook vanuit die briewe van Paulus dat dit ‘n uitdagende omgewing was met heelwat vrae en probleme in die gemeente.  

Om Korinthe reg te verstaan, help om die spanninge en uitdagings van die vroeë Christene in praktyk te sien. Die stad funksioneer as ’n soort steekproef waarin die implikasies van die evangelie vir ’n kosmopolitiese-, moreel verwarde- en sosiaal uiteenlopende samelewing sigbaar word.

Continue reading →

As jy afhanklik is van die staat, is jy nie vry nie.

Posted on by Prof. Gerrit

Vryheid is ’n woord wat maklik gebruik word, maar selde konsekwent deurdink word. In politieke en ekonomiese gesprekke word vryheid dikwels gereduseer tot stemreg of gelykheid voor die grondwet. Tog wys die geskiedenis, en die Bybel nog meer, dat ware vryheid onlosmaaklik verbind is aan verantwoordelikheid, selfstandigheid en orde. Waar hierdie dinge verdwyn, volg afhanklikheid, en waar afhanklikheid wortelskiet, verdwyn ‘n mens se vryheid.

Kom ons praat oor welsyn.

Continue reading →

Ester: Gebore vir ‘n tyd soos hierdie

Posted on by Prof. Gerrit

Ek is dankbaar om aan te kondig:

Die volgende publikasie – Gebore vir ‘n tyd soos hierdie. ‘n Kommentaar op die boek Ester – is op 26 Januarie 2026 vrygestel deur Lig in Duisternis-uitgewers.

Die publikasie verskyn onder outeurskap en redaksie van myself en ds. Schalk Strauss, met verskeie teoloë as medewerkers. Die publikasie gee ‘n gereformeerde perspektief op die boek Ester en fokus onder andere op die verklaring, apokaliptiek, etiek, praktiese toepassings en navorsingsgeskiedenis van dié Ou-Testamentiese boek. Daar word ook in diepte lig gewerp op die verskillende weergawes van Ester in die Masoretiese teks in vergelyking met die Septugaint se Griekse weergawe en apokriewe byvoegings.

Een van die uitnemende kenmerke van die publikasie, is dat daar nie met ‘n histories-kritiese vertrekpunt wat so algemeen in moderne teologiese werke voorkom, gewerk word nie, maar die hele boek werk vanuit die teologiese vertrekpunt van Ester as kanonieke boek wat deur die Heilige Gees geïnspireer is, en derhalwe deel is van die hele Bybelse heilsgeskiedenis en die uiteindelike vervulling in Christus.

Die publikasie is in sagteband te koop by hierdie skakel en sal ook binnekort beskikbaar wees in e-boek formaat by Amazon Kindle.

“Gebore vir ‘n tyd soos hierdie” word aanbeveel vir leraars en lidmate wat die boek Ester wil bestudeer vanuit ‘n behoudende, reformatoriese perspektief.

Bybelvertaling-reeks Deel 8

Posted on by Prof. Gerrit
In deel 8 van die reeks oor Bybelvertaling deur die eeue, word gefokus op die ontstaan van die 1933 Bybelvertaling in Afrikaans en die faktore wat gelei het tot die 1953 hersiening, wat bekend geword het in kerklike kringe as die 1933/53 Afrikaanse Bybelvertaling.

Enkele opmerkings oor Stephan Joubert se beskouing oor man en vrou se rol

Posted on by Prof. Gerrit

Op 15 Januarie 2026 het prof. Stephan Joubert ‘n dokument op sy Facebook-blad geplaas met die titel: Is mans en vroue regtig gelyk? Kantlynaantekeninge oor manlike en vroulike rolle en leierskap in die Nuwe Testament. Op die oog af lyk dit na nog ‘n perspektief op die sosiale rolle van mans en vroue in die Bybel. Tog is daarin ‘n dieperliggende sosiale kommentaar op die vraag oor die plek van vroue in die kerk veronderstel.

Ek het die volgende dokument geskryf uit ’n behoefte om groter teologiese helderheid te bring in ’n gesprek wat tans maklik verskuif van Skrifondersoek na kulturele druk.

Daar bestaan ’n duidelike gevaar dat geldige sosiaal-historiese insigte normatief gemaak word, sonder voldoende rekenskap van die Skrif se eie interne orde. Wanneer statusgelykheid in Christus onkrities vertaal word na rol-identiteit in die kerk, word ’n hermeneutiese skuif gemaak wat nie vanselfsprekend deur die Bybel self geregverdig word nie.

Kortom, die doel van hierdie dokument is nie om kritiek uit te lok nie, maar aan te toon dat die huidige debat oor manlike en vroulike rolle nie net ’n vraag oor kultuur of geregtigheid is nie, maar ’n diep teologiese vraag oor skeppingsorde, amp en die gesag van die Skrif. Die doel is om die gesprek terug te bring na ’n Skrifgebonde, gereformeerd-verantwoordelike grondslag, voordat normatiewe gevolgtrekkings gemaak word.

Jy kan my opmerkings hier lees:

GDS Smit se opmerkings oor: “Sosiale rolle in die Bybel”

Belasting in die antieke wêreld

Posted on by Prof. Gerrit

Foto: Romeinse reliëf wat ’n sensus en administratiewe registrasie uitbeeld, ’n kernpraktyk waarop Romeinse belasting gehef is (in openbare domein beskikbaar – Wikimedia Commons)

Niemand hou van belasting nie

Mense was nog nooit baie gretig om belasting te betaal nie. Dit was so in die antieke wêreld en dit is steeds so vandag. Sodra ’n owerheid aan iemand se inkomste, grond of besittings raak, ontstaan daar vrae oor die bestuur daarvan, wantroue oor die aanwending en soms openlike weerstand. Belasting raak immers altyd nie net iemand se geld nie, maar is ook ‘n kragtige wapen om gesag af te dwing, regverdigheid te toets en vertroue te bewys, of te verloor.

Continue reading →

Sonder gereelde kerkbywoning, groei jy nie in die geloof nie

Posted on by Prof. Gerrit

Waarom die Bybel geen ruimte laat vir geïsoleerde Christene nie

Een van die mees populêre aannames in ons tyd is dat geloof iets persoonliks is wat jy op jou eie kan uitleef. Jy kan glo sonder om deel te wees van ‘n kerk. Jy kan geestelik groei sonder die las om op ‘n Sondag vroeg op te staan. Dit is ‘n onbybelse idee.

Inteendeel, die Bybel gaan uit van die teenoorgestelde. Geloof groei binne ’n liggaam, nie in isolasie nie. Sonder gereelde kerkbywoning en aktiewe deelname aan die gemeente, stagneer geloof, al is die bedoelings opreg.

YouTube kerk is nie kerk nie.

Lees meer…

Van Adam tot Advent

Posted on by Prof. Gerrit

Hierdie video volg die Bybelse lyn van Adam tot Advent. Dit wys hoe Genesis nie net ’n skeppingsverhaal is nie, maar Israel se herdefinisie van menswaardigheid en identiteit. Deur die Hebreeuse teks en die wêreld van antieke Egipte te verstaan, sien ons die betekenis van die die mens wat in God se beeld geskape is, hoe daardie beeld geskend is, en hoe God se antwoord nie wraak nie, maar genade is. Advent word hier verstaan as die voortsetting van daardie verhaal: God wat self kom soek, herstel en herskep in Christus, die laaste Adam.

Geseënde Christusfees!

Die herkoms en betekenis van Advent

Posted on by Prof. Gerrit

Advent word aan die einde van die jaar, gewoonlik die laaste 4 weke voor Kersfees gevier. Maar in die kerklike ritme, is dit die begin van die kerkjaar. Van Kersfees af, volg ons die aardse bediening van Christus tot Paasfees waar ons die Lydensweg, dood, opstanding en hemelvaart van Christus herdenk.

Hierdie artikel handel oor die herkoms en betekenis van Advent.

Lees meer…

Bybelvertaling Deel 7: Die invloed van die Nederlanders en die Franse in SA

Posted on by Prof. Gerrit

Hierdie deel is deel 7 van die reeks oor die geskiedenis van Bybelvertaling.

In hierdie deel word gekyk na die vestiging van die Nederlanders onder die VOC en die Franse Hugenote aan die Kaap. Die Nederlanders het die Statevertaling gebruik en die Franse Hugenote die Geneefse Bybel. Hierdie geskiedenis het ‘n rol gespeel in die ontstaan van Afrikaanse Bybelvertalings, wat in die volgende deel (deel 8) bespreek sal word.

Die bronne van armoede: ’n teologiese perspektief

Posted on by Prof. Gerrit

Armoede is so oud soos die mensdom self, maar dit bly ’n brandpunt in elke tyd en samelewing. Jesus het gesê ons sal die armes altyd by ons hê (Matt. 26:11). Ten spyte hiervan, het elke tyd en elke geslag ‘n verantwoordelikheid om dié wat minderbevoorreg is, te help. Dit is in besonder die roeping van die kerk, wat die barmhartigheid wat Christus aan ons bewys het, ook aan ander moet wys.

Armoede is ‘n groot ekonomiese probleem, en ongelukkig is dit waar baie ekonome en politici vashaak wanneer hulle oor armoede dink en praat. Luister ons na die Bybel, sien ons armoede is ook ’n morele en geestelike krisis wat die hele gemeenskap raak. Elke geslag probeer om armoede te verstaan en te verlig, maar sonder ’n teologiese raamwerk bly die begrip daarvan oppervlakkig en die oplossings tydelik. Die Bybel kyk nie na armoede as bloot ’n sosiale verskynsel nie, maar as iets wat die verhouding tussen God, die mens en sy naaste weerspieël.

Daar is verskillende oorsake van armoede: sommige lê in politieke- en strukturele onreg, ander in persoonlike gebrokenheid en swak keuses. Suid-Afrika het die hoogste werkloosheidsyfer in die wêreld van 42%, waarvan ‘n skokkende 62.2% van die jeug sonder werk is volgens “World of Statistics”. Die land se werkloosheidsyfer word dikwels deur opportuniste as ‘n politieke speelbal gebruik.

Tog moet ons nie vaskyk in die statistieke, sonder om die oorsake te ondersoek en aan te spreek nie. Soos in die tyd van die Bybel en deur al die eeue heen, moet ons ook kategorieë van armoede daarstel om te bepaal wat die omvang van die probleem is. Sommige mense kan nie werk nie, ander wil werk nie, en nog ander het die wil en die vermoë, maar kry nie die geleentheid nie, soms ook weens regstellende aksie. Daar is dié wat werk, maar steeds nie genoeg het nie, en daar is ook dié wat oorvloed het en daarom ’n besondere verantwoordelikheid dra.

Lees meer…

Chanoekka se betekenis vir die Christen

Posted on by Prof. Gerrit

In hierdie artikel word die betekenis van die Chanoekka, of die Fees van die Ligte, verduidelik. Vir Christene dui dit op die oorwinning van lig oor duisternis, die herstel van ware aanbidding, en Christus as die vervulling van die tempel en die voortdurende bron van God se lig in die wêreld.

Lees meer…

 

Nicea 1700: waar staan ons tans?

Posted on by Prof. Gerrit

Die herdenking van die 1700ste jaar sedert die Konsilie van Nicéa (325 n.C.), het vanjaar verskeie geleenthede gebied om die kern van die Christelike geloof weer te oordink en te bely.

Hierdie referaat, wat ek aangebied het tydens die Gereformeerde Konvent van die Koinonia-Sinode op 25–26 September 2025, ondersoek die historiese- en teologiese betekenis van Nicéa en vra watter implikasies dit vir die kerk van vandag inhou? Dit ondersoek ook die faktore wat aanleiding gegee het tot die Skrifkritiek, wat die Skrif en die waarheid van die belydenisse van die kerk bevraagteken.

Continue reading →

Om te sê Jesus is Koning, is die mees politiese uitspraak ooit

Posted on by Prof. Gerrit

Wanneer Christene sê dat “Jesus die Christus” is, maak hulle ’n openbare, politieke verklaring. Hulle maak ‘n verklaring wat die magstrukture van die wêreld direk uitdaag. Die evangelie is nié ’n a-politiese boodskap nie. As ons sê dat alle gesag aan Christus onderwerp is, sê ons indirek dat alle aardse magte aan Hom onderwerp is. Dit beteken dat géén aardse mag vir altyd sal hou nie en dat alle regerings sal verbygaan. Dit is dus ’n politieke aankondiging wat alle aardse gesag onder Christus se heerskappy plaas. Continue reading →

Reformerend of ‘ge’-reformeerd?

Posted on by Prof. Gerrit

Vandag is 31 Oktober. Op dié dag in 1517, het Martin Luther die 95 stellinge teen die kerkdeur in Wittenberg vasgespyker. Dit het die reformasie begin.

Daar is ’n groot verskil tussen om Gereformeerd te wees en om reformerend te wees. Die een is in die verlede tyd, die ander een is ’n werkwoord. Die een verwys na iets wat eenmaal gebeur het, die ander na iets wat steeds moet gebeur. In die woord “ge-reformeerd” lê daar iets van ’n afgehandelde gedagte: die gevoel dat alles klaar is, dat ons reeds die waarheid het, en dat ons nou net moet bewaar wat daar is. Maar in die woord reformerend lê daar beweging. Dit dui op ’n aksie wat voortdurend deur die Woord van God gevorm en herskep word.

Continue reading →

Aangename kennis Jean Cauvin, alias Calvyn

Posted on by Prof. Gerrit

Ons herdenk hierdie week die Protestantse kerkhervorming wat amptelik begin het op 31 Oktober 1517 toe Martin Luther die 95 stellinge teen die Roomse dwaalleer teen die Wittenberg kerkdeure vasgespyker het.

Een van die bekendste figure uit die kerkhervorming, was Johannes Calvyn. In hierdie artikel kyk ons kortliks na die lewe van Johannes Calvyn en sy stryd teen die Libertyne, veral Bolsec, asook die bewerings dat die kerkhervorming deur Joodse geld gefinansier was om die Rooms-Katolieke Kerk te ondermyn.

Lees meer…

 

Bybelvertaling Deel 6: Martin Luther en William Tyndale

Posted on by Prof. Gerrit

In hierdie 6de deel oor Bybelvertaling fokus ons op Bybelvertaling tydens die Reformasie en in besonder die bydrae van Martin Luther & William Tyndale tot ons verstaan van Bybelvertaling vandag.

Dr. John William Span van Kanada besoek die APA

Posted on by Prof. Gerrit

Dr. Span van Kanada, het ‘n gaslesing by die teologiese fakulteit van die APA gelewer. As boorling van Kanada, doktoreer hy in Frankryk.

Dr. John, sy vrou Anne en hulle drie seuns ontmoet Islam vir die eerste keer in Guinea (Wes-Afrika). Hy werk onder meer ook onder die Islam in Kaïro. ‘Om Islam te “her-interpreteer” sodat die Kor’an Christelik klink, is oneerlik’, meen dr. Span.

Kerkwees as belangrikste bron van kultuurverandering

Posted on by Prof. Gerrit

Die kerk is nie maar net ‘n instelling wat vir ’n uur op ’n Sondag funksioneer nie. Die mens is in wese homo adorans – ’n aanbiddende wese. Daarom vorm die wyse waarop die kerk aanbid, die manier waarop ons oor die die wêreld dink, hoe ons werk en hoe ons leef. Almal aanbid iets of iemand. As dit nie God is nie, is dit iets of iemand anders. Daarom is kerkwees belangrik. Dit vorm kultuur.

Lees meer..