Algemene aankondigings

Die teologie van blokketting-tegnologie

Posted on by Prof. Gerrit

Die AP Akademie bied die volgende Kortkursus aan:
Die teologie en praktyk van blokketting-tegnologie, met fokus op Bitcoin
Aanbieder: prof. Gerrit Smit
Departement Nuwe Testament | Publieke Teologie

Die ekonomie verander. Tegnologie verander. Die vraag is: hoe moet die kerk daaroor dink?

Blokketting-tegnologie en digitale geldstelsels, soos Bitcoin, beïnvloed reeds die wêreldekonomie op terreine wat vroeër ondenkbaar was. Inflasie, fiskale onsekerheid en toenemende sentralisering roep nuwe vrae op oor Christene se beskouing oor rentmeesterskap, mag, vertroue en verantwoordbaarheid. Hierdie kortkursus help jou om Skrifgetrou te dink oor die kerk se roeping en die Bybel se antwoorde op ekonomiese kwessies van die dag.

Wat word behandel?

  • Die Bybelse getuienis oor geld, besittings en rentmeesterskap
    • Die geskiedenis van geld, van die antieke ruilhandel tot moderne FIAT
    • Inflasie, rente en monetêre beleid in teologiese perspektief
    • Gedesentraliseerde vs. gesentraliseerde stelsels
    • Etiese en teologiese vrae rondom digitalisering van die ekonomie
    • Wat is blokketting-tegnologie en hoe werk dit?
    • Praktiese demonstrasie:
    Hoe werk ’n Bitcoin-transaksie?
     Hoe lees ‘n mens ‘n blokketting grootboek (ledger)?
     Wat is publieke adresse en private sleutels?
     Hoe word ‘n blok gevorm en waarom is dit onomkeerbaar?

Hierdie kursus is nie bedoel as spesialisopleiding nie, maar as teologiese oriëntering en Skriftuurlike beoordeling van ’n aktuele vraagstuk, met praktiese voorbeelde wat jou sal inlei in die verstaan van blokketting-tegnologie. 

Datum: Vrydag 29 Mei 2026 (sal later weer herhaal word indien daar genoeg belangstelling is)
Tyd: 08:00–15:00 (teorie) | 16:00–18:00 (praktiese sessie)
Plek: APA Senaatsaal (Farendenstraat 430, Clydesdale, Pretoria)
Koste: R750 per persoon, verversings en middagete ingesluit
Beperkte plekke beskikbaar, minimum 10 kursusgangers
‘n Selfassessering van 2 ure sal na afloop van die kursus vereis word om ‘n sertifikaat van bywoning te ontvang. 

Vir enige gelowige wat ernstig wil dink oor die ekonomie in diens van die koninkryk van God.

Die tegnologie is hier om te bly.
Die vraag is of jy gereed is daarvoor?

Navrae: info@apa.ac.za

Registreer hier: https://forms.gle/78mPaNmQUwjq8g9Q

Ester: Gebore vir ‘n tyd soos hierdie

Posted on by Prof. Gerrit

Ek is dankbaar om aan te kondig:

Die volgende publikasie – Gebore vir ‘n tyd soos hierdie. ‘n Kommentaar op die boek Ester – is op 26 Januarie 2026 vrygestel deur Lig in Duisternis-uitgewers.

Die publikasie verskyn onder outeurskap en redaksie van myself en ds. Schalk Strauss, met verskeie teoloë as medewerkers. Die publikasie gee ‘n gereformeerde perspektief op die boek Ester en fokus onder andere op die verklaring, apokaliptiek, etiek, praktiese toepassings en navorsingsgeskiedenis van dié Ou-Testamentiese boek. Daar word ook in diepte lig gewerp op die verskillende weergawes van Ester in die Masoretiese teks in vergelyking met die Septugaint se Griekse weergawe en apokriewe byvoegings.

Een van die uitnemende kenmerke van die publikasie, is dat daar nie met ‘n histories-kritiese vertrekpunt wat so algemeen in moderne teologiese werke voorkom, gewerk word nie, maar die hele boek werk vanuit die teologiese vertrekpunt van Ester as kanonieke boek wat deur die Heilige Gees geïnspireer is, en derhalwe deel is van die hele Bybelse heilsgeskiedenis en die uiteindelike vervulling in Christus.

Die publikasie is in sagteband te koop by hierdie skakel en sal ook binnekort beskikbaar wees in e-boek formaat by Amazon Kindle.

“Gebore vir ‘n tyd soos hierdie” word aanbeveel vir leraars en lidmate wat die boek Ester wil bestudeer vanuit ‘n behoudende, reformatoriese perspektief.

A Protestant engagement with the Martyrdom of Perpetua and Felicity

Posted on by Prof. Gerrit

Indien iemand belangstel, hier is my nuutste akademiese stuk oor die Martelaarskap van Perpetua en Felicitas op Academia.edu (Neem kennis: dit is in Engels). Ek plaas dit hier indien daar leraars of studente is wat dit wil lees.

Kies hier om dit te lees…

Perpetua en Felicitas in die arena in Kartago.

Opsomming:

Die Passio Perpetuae et Felicitatis (die Martelaarskap van Perpetua en Felicitas) is ’n belangrike teks binne die vroeg-Christelike martelaarsliteratuur. Akademici het dit reeds uitgelig as ’n werk wat historiese konteks, literêre vorm, geslagsdinamiek, teologiese simboliek en ekklesiologiese betekenis het. Dit speel af binne die sosio-politieke milieu van Kartago in die tweede-derde eeu na Christus.

Hierdie studie ondersoek hoe die martelaarskap van Perpetua en Felicitas die Romeinse gesag uitgedaag het en terselfdertyd die Christelike identiteit bevestig het. Perpetua se visioene, tesame met die teks se simboliek, metafore en sakramentele motiewe, toon dat die Passio beide ’n getuienis van geloof te midde van vervolging was en ’n vroeg-Christelike teologiese werk met eskatologiese en ekklesiologiese diepte.

Moderne patristiese navorsing beklemtoon dikwels kwessies oor geslag, status en die rol van vroulike stemme in die kerk. Perpetua se outobiografiese bydrae tot die teks self en haar visioene word daarom dikwels geïnterpreteer deur die bril van feministiese, Montanistiese en martelaarsteologiese raamwerke, hoewel nie altyd vanuit ’n Protestantse hoek nie.

Hierdie studie oorweeg hierdie benaderings vanuit ’n Protestantse perspektief, wat die betekenis van die teks bevestig maar terselfdertyd waarsku teen interpretasies wat dit losmaak van sy leerstellige en buite-Bybelse grondslag.

Pilgrim’s Progress gratis beskikbaar

Posted on by Prof. Gerrit

Ek het reeds vantevore hier berig oor die bekendstelling van John Bunyan se Pilgrim’s Progress. Verlede jaar is die animasiefilm bekend gestel en as deel van die wêreldwye COVID-19 inperkings wat tans 2 biljoen mense in afsondering het, stel hulle die film gratis beskikbaar aan Christene wêreldwyd.

John Bunyan was ‘n predikant wat ongeveer 300 jaar gelede geleef het en in die tronk gegooi is omdat hy geweier het om op te hou om oor Christus te preek. Terwyl hy in die tronk was het hy die boek: The Pilgrim’s Progress geskryf. Sedert die publisering van die boek was die boek nog nooit uit druk nie en naas die Bybel, is Pilgrim’s Progress die boek wat die meeste gelees is ooit.

Dit is werklik ‘n besondere film wat u met vrymoedigheid as gesin kan kyk. Die film vertel die verhaal van ‘n Christen (Christian) wat ontslae probeer raak van sy sorge en oral probeer tot hy uiteindelik die nou pad ontdek na vryheid en verlossing.

Maak gerus gebruik van Revelation Media se gratis aanbod om die film te kyk saam met u gesin.

Die film kan hier afgelaai word en vereis ‘n geldige e-posadres.

Oordenkings bygevoeg

Posted on by Prof. Gerrit

Is jy in die kantoor en wil graag vir ‘n rukkie stil word met ‘n Skrifgedeelte en oordenking vir die dag? Moet jy ‘n vergadering open en jy is nie seker wat om te lees nie? Miskien moet jy iemand in die hospitaal besoek en wil graag vir hulle ‘n bemoedigende gedagte laat? Of dalk wil jy net graag meer oor ‘n gedeelte in die Bybel te wete kom?

Kyk gerus na die “Dink” skakel. Ek het heelwat nuwe oordenkings bygevoeg.