Het Maria gesterf of opgevaar na die hemel?
Het Maria gesterf of opgevaar na die hemel?
prof. Gerrit Smit
Die vraag het te doen of Maria soos ‘n gewone mens gesterf het, en of sy ‘n buitengewone afsterwe of hemelvaart beleef het soos Christus? Laasgenoemde is die standpunt van die Rooms-Katolieke kerk.
Ten spyte van die wonderlike gebeure rondom die geboorte van die Here Jesus, vertel die Bybel vir ons dat Maria nie buitengewone gawes of goddelike eienskappe gehad het nie. Inteendeel vertel die Bybel vir ons dat Maria self nie alles wat Jesus gesê en gedoen het, verstaan het nie.
Al verstaan Maria nie alles wat Jesus sê en doen nie (Luk 2:19), bly sy op Hom vertrou (Joh 2:3-5).
Na die Here Jesus se opstanding is Maria saam met die gelowiges eendragtig in gebed op die dag met die uitstorting van die Heilige Gees.
Wanneer ons die laaste keer in die Bybel van Maria lees, neem sy haar plek in die gemeente op as ‘n gewone lidmaat (Hand 1:14).
Die Bybel vertel nie vir ons wat verder van Maria geword het nie. Baie geleerdes meen dat Maria in die huis van Johannes gewoon het in Jerusalem of in Efese. Sommige reken sy was deel van die gemeente in Efese in die tyd toe Timothéüs daar leraar was (1 Tim. 1:3).
Maria was wel deur God gekies vir ‘n baie unieke taak, en ons glo dat sy by Christus in die hemel is. Sy kon egter nie op ‘n soortgelyke wyse as Christus opvaar na die hemel nie aangesien ons nêrens in die vroeg-Christelike kerk of in die Bybel enige verwysings na so iets het nie, en omdat Maria ‘n gewone mens soos ons was. Ons aanvaar dus dat Maria aan die einde van haar lewe soos enige ander gelowige gesterf het, en dat sy in die hemel is op grond van die soenverdienste van Christus wat ook vir haar sondes betaal het.
Ons kan dus sê dat al was Maria ‘n besondere mens in die Bybel, en op ‘n besondere manier deur God geseën, is daar geen grond in die Bybel vir die sogenaamde Maria-verering van die Rooms-Katolieke kerk nie.