Wanneer en hoe het Paulus gesterf?

Wanneer en hoe het Paulus gesterf?

prof. Gerrit Smit

Paulus se bekering het waarskynlik in 33 of 34 n.C. plaasgevind. Om genoeg speling tussen Jesus se aardse optrede en Paulus se bekering te laat, kan ons laasgenoemde moeilik voor 33 of 34 plaas. Om die 15-16 jaar van Gal. 2:1 voor Paulus se vertrek op sy tweede sendingreis (in die lente of somer van 49) in te pas, kan ons sy bekering egter ook weer moeilik later as 33 of 34 plaas. Paulus het dus kort (minder as ‘n jaar) na Jesus se hemelvaart tot bekering gekom. 

Na sowat 2½  jaar in die Oos-Jordaangebied (Gal. 1:17 v.) kom hy in 35/6 in Jerusalem aan, maar moet mettertyd na Tarsus uitwyk (Hand. 9:30). Daar gaan Barnabas hom in 46/47 haal, waarna hulle ‘n jaar saam in Antiochië werk (Hand. 13-14). Hierna vind die eerste sendingreis in 48 plaas (Hand. 13-14), gevolg deur Paulus en Barnabas se noodlenigingsbesoek en die Apostelkonvent later dieselfde jaar.

Paulus se tweede sendingreis verloop vanaf lente (= Mei) of somer 49 tot lente 52 (Hand. 15:40 – 18:22), waartydens hy vir sowat 1¾ jaar in Korinte werksaam is en daarna na Antiochië terugkeer  (Hand. 18:19-22).

Die derde sendingreis verloop vanaf somer 52 tot April 56 (Hand. 18:23 – 21:15), waartydens Paulus byna 3 jaar in Efese vertoef (Hand. 19:8, 10, 22, 20:31). Na Pinkster 55 (1 Kor. 16:8 v) vertrek hy daarvandaan en bring die winter van 55-56 in Korinte deur (Gal. 1 Kor. 16:6, Hand. 20:3). Hy moes hiervandaan begin April vertrek het, want ons lees dat hy onderweg na Jerusalem tydens Pase 56 in Filippi vertoef (Hand. 20:6. Paasfees het op 18 April geval).

Pinkster 54 word hy in Jerusalem gevange geneem (Hand. 21, vgl. 20:16). Hierna verkeer hy vir meer as twee jaar in Cesarea in gevangenskap (Hand. 23:33 – 26:32 vgl. veral 24:27), en reis in September 58 tot Februarie 59 (Hand. 27-28, vergelyk veral  27:9-12 en 28:11) as gevangene na Rome. Hier was hy van Maart 59 tot minstens 61 in gevangenskap. In hierdie tydperk word die Pastorale Briewe deur Paulus geskryf, en daarna moet ons ‘n tydperk van vrylating uit hierdie gevangenskap veronderstel, waartydens hy die plekke wat in die Pastorale Briewe genoem word – en kort daarna ook Spanje – besoek het.  Hierna is hy weer gevange geneem en het hy vermoedelik voor Julie 64 reeds die marteldood onder keiser Nero gesterf.