Wat moet ons weet as ons wil trou?
Wat moet ons weet as ons wil trou?
prof. Gerrit Smit
Elke huweliksbevestiger het hulle eie reëlings.
Hier is ‘n aantal algemene reëls en voorskrifte wat in meeste gevalle geld.
TOELAATBARE PLEKKE WAAR HUWELIKE VOLTREK MAG WORD
Volgens die Wet op Huwelike is die volgende van toepassing op ‘n huwelik binne die Republiek van Suid-Afrika:
“Plek waar ’n huwelik bevestig word”
Die wet vereis dat die huwelik bevestig word in ’n gebou, waarvan die deure kan oopstaan, in die teenwoordigheid van beide partye en ten minste twee getuies.
Die wet spesifiseer ook verder die volgende plekke:
• Enige gebou wat as plek van aanbidding vir die algemene publiek dien, vir die geloof waarvoor die predikant as huweliksbevestiger optree. In die geval van die AP Kerk predikante sal dit dus die AP Kerk geboue en sale wees.
• Enige gebou wat tydelik as plek van aanbidding gebruik word – bv. ‘n kapel by ‘n geregistreerde onthaalplek.
• Publieke gebou – bv. gebou van Departement van Binnelandse Sake.
• Privaat woonhuis
• Hospitaal / versorgingsoord / ouetehuis – in die geval waar een of beide van die partye langtermyn of ernstig siek is of ’n liggaamlike gebrek het, wat dit vir hom/haar onmoontlik maak om by een van die plekke hierbo genoem in die huwelik te tree.
Daarom moet veral gemeld word dat huwelike wat bevestig word op plase, die strand en ander openbare plekke wat nie hierbo genoem is nie met groot versigtigheid hanteer moet word. Indien die plek nie geskik is om te voldoen aan die vereistes van die huwelikswet nie moet die egpaar kennis neem dat daar van hulle vereis sal word om die wetlike deel van die huwelik op ‘n plek te bevestig wat deur die wet vereis word terwyl die kerklike deel op enige plek van hulle keuse kan geskied. Die wetlike deel kan selfs ‘n dag of twee voor die seremonie afgehandel word.
FORMAAT VAN EGSKEIDINGSBEVELE
Die Departement van Binnelandse Sake eis die volgende van huweliksbevestigers indien een of albei van die huwelikspaar voorheen getroud was en geskei het:
Weens probleme met vervalsings en bedrog, moet alle egskeidingsbevele wat na 2006 uitgereik is, oor die volgende kenmerke beskik:
1. ‘n Kantoor-stempel van die griffier van die hof waar die bevel uitgereik is;
2. Die griffier van die hof se handtekening;
3. Die name en ID-nommers van beide partye genoem in die egskeidingsbevel.
By egskeidings wat van voor 2006 dateer, moet die oorspronklike bevel aan die huweliksbevestiger getoon word met ‘n gewaarmerkte afskrif.
WEDUWEES/WEWENAARS
Indien ‘n weduwee/wewenaar in die huwelik tree, moet die oorspronklike sterftesertifikaat van die afgestorwe wederhalf getoon word met ‘n gewaarmerkte afskrif van die sertifikaat wat aan die huweliksbevestiger oorhandig word.
BEVOEGDHEID VAN BEVESTIGER
’n Huwelik is wettig vanaf die oomblik dat die huweliksregister ten tyde van die seremonie deur die vyf persone (egpaar, twee getuies en huweliksbevestiger) – die minimum aantal wat teenwoordig moet wees – onderteken is.
Slegs persone met predikantstatus wat geregistreer is as huweliksbevestiger of enige ander aangewese huweliksbevestiger kan permanente huweliksbevestigers in die AP Kerk wees en moet oor ‘n huweliksbevestigersnommer van die Departement van Binnelandse Sake beskik wat toon dat hy/sy wettig aangestel is as huweliksbevestiger. Die persoon moet ook oor ‘n eie stel huweliksertifikate en ‘n eie huweliksregister beskik van die Departement van Binnelandse Sake. U moet dus altyd seker maak dat die huweliksbevestiger wel by die Departement van Binnelandse Sake geregistreer is en ‘n wettige bevestigernommer het.
KONTAK MET LERAAR
Die spesifieke datum en tyd en plek moet deur die voornemende egpaar persoonlik met die leraar wat die huwelik sal bevestig, uitgeklaar en gefinaliseer word. Die leraar sal alles in sy vermoë doen om nie laat te wees vir die seremonie nie.
Aangesien die leraar ‘n professionele diens lewer aan die huwelikspaar, word die egpaar versoek om ook nie laat te wees vir die seremonie nie. Dit kan moontlik wees dat die leraar ‘n ander afspraak geskeduleer het na die huwelik, wat beteken dat hy nie onbepaald beskikbaar kan wees vir die bevestiging van u huwelik nie. Indien die bruid/bruidegom meer as ‘n halfuur laat is vir die seremonie sonder ‘n goeie en aanvaarbare verskoning, kan die huweliksbevestiger besluit om die huwelik nie te bevestig nie. Alternatiewelik kan die huwelikspaar die leraar versoek om steeds die huwelik te bevestig, maar ‘n addisionele koste van R250 per uur of gedeelte daarvan is aan die leraar betaalbaar.
FINALISERING VAN REËLINGS
Voordat die huwelikseremonie ‘n aanvang neem, moet die bruidspaar verseker dat die ooreengekome fooie betaal is.
DOKUMENTE WAT DIE LERAAR VOOR DIE HUWELIKSBEVESTIGING MOET ONTVANG
a) ‘n Gesertifiseerde afskrif van die oorspronklike ID dokument (nie bestuurslisensie nie) van die bruidegom, bruid en alle getuies.
Indien die ID dokument van enige party nie beskikbaar is nie, ‘n voltooide vorm BI-31A (Afrikaans) of BI-31E (Engels) wat by die leraar of Departement van Binnelandse Sake beskikbaar is.
LET WEL: ‘n wettige paspoort en / of visum is in hierdie geval nodig en ‘n gesertifiseerde afskrif daarvan moet by die aansoekvorm aangeheg word. Indien die bruid/bruidegom geen ID/Paspoort/Visum beskikbaar het nie, moet die huwelik uitgestel word totdat die nodige dokumente by die Departement van Binnelandse Sake verkry is. Die leraar is wetlik verplig om nie die huwelik sonder hierdie dokumente te voltrek nie.
Indien een van die partye wat in die huwelik bevestig word, ‘n buitelander is, moet hy / sy ’n amptelike bewys van sy / haar huwelikstatus vanaf die betrokke konsulaat / ambassade verskaf, met ‘n brief van die konsulaat / ambassade dat die huwelik in die Republiek van Suid-Afrika voltrek mag word.
b) Indien die egpaar buite gemeenskap van goedere [op huweliksvoorwaardes, met of sonder die aanwasbedeling] trou, moet die egpaar die leraar voorsien van ‘n brief van die prokureur / notaris wat die kontrak bevestig.
c) Ingeval een of beide van die partye minderjarig [onder die ouderdom van 18 jaar] is, ‘n voltooide vorm BI-32A of BI-32E [dit is by die Departement van Binnelandse Sake verkrygbaar].
Waar ‘n minderjarige kind se ouer/voog nie opgespoor kan word om die BI-32A of BI-32E te voltooi nie, moet ‘n vorm BI-34 deur ‘n kommissaris van kindersorg voltooi word [dit is by die Departement van Binnelandse Sake verkrygbaar].
d) 3 Kleur / swart-en-wit paspoort grootte foto’s van beide die bruidegom en bruid.
e) ‘n Gewaarmerkte afskrif van bewys van residensiële adres (of ‘n verklaring by ‘n polisiestasie afgelê indien die bewys nie beskikbaar is nie)
Die ondertekening van die huweliksregister vind direk na die huweliksbevestiging in die kerkgebou plaas. Daar moet ‘n tafel en 2 stoele voor in die gebou wees waar die seremonie plaasvind. Twee getuies (wat deur die egpaar self aangedui word) moet die huweliksdokumente mede-onderteken.
Geen foto’s mag tydens die diens geneem word nie – wel voor en na die tyd.
‘n Video-opname kan gemaak word, maar dit moet ‘n statiese opname wees. Beligting moet ook nie steurend wees nie.
Die onthaal – ongeag waar dit gehou word – behoort ook so gereël te word dat dit geensins afbreuk doen aan die betekenis van die huweliksplegtigheid wat dit voorafgaan nie, maar dat dit die Here verheerlik en ‘n getuienis uitdra van hoe gelowiges in die Here feesvier.