Ek is gekies as ouderling. Wat moet ek weet?

Ek is gekies as ouderling. Wat moet ek weet?

prof. Gerrit Smit

Indien u gekies word as ‘n ouderling, moet u die volgende weet:

1 Tim. 3:1-7 en Titus 1:5-9 gee vir ons belangrike opdragte ten opsigte van die diens van die ouderling in die kerk van Christus. Die inhoud van hierdie belangrike Skrifgedeeltes kan soos volg saamgevat word:
  • ‘n Ouderling moet ‘n voorbeeldige lewenswandel hê.  Hy moet “onberispelik” wees  (1Tim. 3:2;  Tit. 1:7)
  • ‘n Ouderling moet duidelik laat blyk dat hy die sonde afgesterf het en daagliks daarteen stry.  Mense wat te veel drink, gou kwaad word, eie belang voorop stel en geldelike gewin najaag (1Tim. 3:3;  Tit. 1:7), hoort nie in die ouderlingbank nie.
  • ‘n Ouderling moet die vrug van die Gees in sy lewe dra.
  • ‘n Ouderling se huislike lewe moet bo verdenking staan.  Hy moet die heiligheid van die huwelik in ere hou, ‘n goeie vader vir sy kinders wees en sorg dra dat hulle vir die Here lewe (1Tim. 3:2;  Tit. 1:6)
  • ‘n Ouderling moet oor leiersbekwaamhede beskik  (1Tim. 3:2;  Tit. 1:9).  Dit beteken nie dat hy groot geleerdheid moet hê nie, maar wel oor die gawe moet beskik om met sy mense oor geestelike en kerklike aangeleenthede te gesels.
  • ‘n Ouderling moet oor lewenservaring en ondervinding ten opsigte van die Christelike lewe beskik.  “Hy moet nie ‘n nuweling wees nie…”  (1 Tim. 3:6)
Volgens die Formulier:
“Uit die Bybel is dit duidelik dat ‘n ampsdraer bekend moet wees as iemand met ‘n lewende geloof, iemand met ‘n begeerte om vir die Here te werk, een wat bekwaam is om te onderrig, wat ook gewillig om daarvoor toegerus te word en wat die Heilige Skrif voortdurend ernstig ondersoek.  Verder moet ‘n ampsdraer “onberispelik wees, die man van een vrou, nugter, ingetoë, fatsoenlik, gasvry” (1 Tm 3:2), in alle opsigte betroubaar (Hd 6:3) en met die Gees van God vervul.”
In die formulier word agt vereistes duidelik gestel:
  • ‘n Lewende geloof
  • ‘n Begeerte om vir die Here te werk
  • Bekwaam om te leer
  • Gewillig om toegerus te word
  • ‘n Ywerige Bybelstudent
  • Hoë sedelike peil
  • In alle opsigte betroubaar
  • Geesvervuld
Dit is uit bogenoemde duidelik dat die Here hoë eise stel aan die mense wat Hy roep om sy werk op aarde voort te sit.  Daarom is dit belangrik dat u uself sal ondersoek of u aan hierdie vereistes voldoen.  Dit vra ‘n algehele oorgawe aan die Heilige Gees.  Dit beteken verder dat u ‘n ywerige Bybelstudent sal wees wat bereid is om die Here kinderlik te gehoorsaam.  Maak gerus van Bybelstudie-kursusse gebruik om u te help om die Bybel beter te verstaan.  Gebed is ook van die uiterste belang vir u geestelike groei.  Sonder u daarom gereeld af en praat met die Here.  Onthou ook om u wyk se mense aan Hom op te dra.  Verder moet u op hoogte wees met die belydenisskrifte van die AP Kerk, te wete die Nederlandse Geloofsbelydenis, Heidelbergse Kategismus en Dordtse Leerreëls.
TAAK VAN DIE OUDERLING
Volgens Hand. 20:28 en 1 Petr. 5:1-4 moet die ouderling die volgende weet:
  • Die Heilige Gees het die kudde aan die ouderling se sorg toevertrou  (Hand. 20:28;  1 Petr. 5:2).  Dit gee vrymoedigheid – hy kan sy werk doen met die gesag wat die Here gee.  Maar dit bring ook ‘n dure verantwoordelikheid mee – die Here gaan van hom rekenskap eis  (vgl. Hebr. 13:17).
  • Die ouderling is herder van God se kudde.  Soos ‘n herder sy kudde oppas en versorg, moet die ouderling oor die mense van sy wyk waak en hulle geestelik versorg  (Hand. 20:28;  1 Petr. 5:2).  Kyk ook wat die Here in Eseg. 34 sê oor die taak van die herders.
  • Die gemeente is vir die Here kosbaar – Hy het hulle duurgekoop.  Dit het Hom die bloed van sy Seun gekos (Hand. 20:28).  Daarom mag die ouderling nie die gemeente verwaarloos nie.
  • Die ouderling moet sy werk gewillig, toegewyd en nederig doen  (1 Petr. 5:2 en 3).  Hy moet nie baasspelerig wees nie, maar deur sy voorbeeld lei.
Volgens die Formulier:
“Broeders, ouderlinge, u dra as opsieners(s) en rentmeester(s) (vgl. Tt 1:7) van die huishouding van God die verantwoordelikheid vir die opbou en geestelike versorging van hierdie gemeente.  U moet toesien dat alle gemeentelede hulle in belydenis en lewenswandel soos lewende lidmate van die kerk van Jesus Christus gedra.
Volgens die voorbeeld van Christus moet u u herderlike taak dienend uitvoer.  Deur voorbidding, huisbesoek en siekebesoek moet u die lidmate bystaan, vertroos en in hulle geloof versterk en bemoedig.  U moet ook vir die dooplidmate verantwoordelikheid neem sodat hulle gelei en geleer word om die Here te ken en te dien.
Die onordelikes en die onverskilliges moet u in liefde vermaan.  Volgens die bepalings van die Kerkorde moet u teen diegene wat in sonde volhard, met die kerklike tug optree, sodat hulle tot bekering kan kom.  Gee ook ag op mekaar, en op die leer en lewe van die bedienaar van die Woord, sodat alles tot opbouing van die kerk mag strek en geen vreemde leer voorgedra word nie.  Daarvan lees ons in Hand 20:29 waar die apostel waarsku dat goed gewaak moet word teen die wrede wolwe wat onder die kudde van Christus mag inkom.
Waak saam met die leraar oor die erediens en sorg vir die onderhouding daarvan.  Werk met ywer en oorgawe mee aan die uitbreiding van die Koninkryk.  Hou toesig oor die suiwere bediening van die Woord, en dra sorg dat die sakramente nie ontheilig word nie.
Reëlings van die AP Kerk Wonderboom
Die erediens
1. Woon getrou by.  Indien moontlik, sê asb. vooraf vir die leierouderling indien u nie ‘n diens kan bywoon nie.  Wees asb. soggens 08:45 en saans (wanneer daar aanddienste is) om 17:50 in die konsistorie.
2. Wees bedagsaam om lidmate (veral in u wyk) wat vervoerprobleme het, of sku is vir die kerk, saam te bring.
3. Neem die pos in u rakkie getrou.
Huisbesoek in u wyk
1. Die geestelike versorging van u wyksmense is u verantwoordelikheid.  Besoek hulle daarom so gereeld as moontlik (ten minste 4x per jaar).  Geleentheidsbesoekies sal ook help.
2. Stel vas wat die behoeftes van u mense is en gee aandag daaraan.  Indien u hulp nodig het, skakel u leraar.
3. Bespreek u wyk gereeld met u leraar.  Benut in dié verband veral die ouderlingraadsvergadering.  Werk saam met hom aan ‘n bedieningstrategie vir u wyk.
4. Hou u wykskaartjies op datum.  Gee inligting i.v.m. nuwe intrekkers, vertrekkers en verskuiwers (d.w.s mense wat na ‘n ander adres in die gemeente verhuis het) by die leraar/skriba in sodat die rekenaardata opgedateer kan word.  Neem ook kennis van nuwe intrekkers van wie u kennis kry.
5. Gee spesiale aandag aan siektes, sterfgevalle en ander gevalle van beproewing.
6. Kontrolleer tydens u gewone huisbesoeke of ouers hulle doopbelofte nakom.  Gee spesiale aandag aan ouers wat onlangs gedoop het.
Doop 
U speel ‘n belangrike rol by die bediening van die doop
1. Gee spesiale aandag aan gesinne waar ‘n baba op pad is. As hulle nie getrou kerk toe kom nie, verwys vriendelik na ons kerkraad se besluit om net toestemming te gee tot die doop van kindertjies wie se ouers kerklik meelewend is.
2. Lê  ‘n gelukwensingsbesoek af sodra die moeder en baba tuis is. Stel u leraar en die skriba van die geboorte in kennis.
3. ‘n Egpaar moet een maand voordat hulle wil doop, by u aanmeld daarvoor.
4. U besoek die aansoekers so gou moontlik en oorhandig ‘n kopié van die doopformulier aan hulle om te lees.
5. U bespreek die mense se aansoek met u leraar en kom saam tot ‘n besluit oor u aanbeveling aan die kerkraad i.v.m. toestemming om te doop.
6. U reël in oorleg met die leraar vir ‘n besoek waartydens dooponderrig aan die ouers plaasvind.
7. As die aansoeker nog nie kan laat doop nie, moet hulle intensiewe aandag ontvang.  As hulle kerkgang en melewing na drie maande nog nie so verbeter het dat u en u leraar kan aanbeveel dat hulle kan doop nie, moet u ernstig oorweeg om ‘n klag van oortreding van die vierde gebod by die kerkraad in te dien sodat met formele kerklike tug begin kan word.
8. Besoek ‘n egpaar wat laat doop het gou na die doop weer (verkieslik binne ‘n maand).  Dis veral belangrik dat alle ouers in staat moet kan wees om verbondsonderrig aan hulle kinders te gee.  Indien hulle leiding in dié verband verlang bespreek dit met u leraar.
Nagmaal
1. Indien u u wyk voor nagmaal besoek, help u lidmate om die nodige selfondersoek te doen ten einde met vrymoedigheid aan die tafel van die Here aan te sit.
2. Indien u u wyk na nagmaal besoek, gesels u met lidmate oor die dankbaarheidsvrug in hulle lewens.
3. Besoekers in u wyk wat nagmaal wil gebruik, moet by u toestemming vra.  U meld dit by die konsistorie aan voor nagmaal.
Wyksbyeenkomste
1. U is vir die byeenkomste in u wyk verantwoordelik.
2. Indien u hulp verlang met ‘n onderwerp vir die wyksbyeenkoms, kan u met u leraar in dié verband skakel.
3. Maak die byeenkoms ‘n week voor die tyd by u mense bekend.  U kan ook die adres van die byeenkoms by die skriba besorg op die Donderdag voor die byeenkoms sodat dit in die afkondigings opgeneem kan word.
Verbondsonderrig, jeugaksies en belydenisaflegging
1. Betrek die kinders wanneer u huisbesoek doen.  Vra uit oor hulle verbondsonderrig en gemeentelike betrokkenheid.
2. Wanneer die verbondsonderrighoof die naam van ‘n ontroue kind onder u aandag bring, besoek die gesin en rapporteer terug.
3. Stel deurlopend belang in die jongmense in u wyk wat in die belydenisklas is.  Wanneer hulle aansoek doen om belydenisaflegging, is u deel van die ouderlingraad wat hulle moet ondersoek. Opvolgwerk na die belydenisaflegging is ook belangrik.
4. Oorweeg dit biddend of die Here u nie ook roep om self verbondsonderrig te gee nie.
Kerkraads- en kommisievergaderings
1. Lees u sakelys, notule en kommissieverslae goed deur aangesien dit op die kerkraadsvergadering as gelese beskou gaan word.  Onthou dit is vertroulik en nie vir ander lede van u gesin bedoel nie.
2. As u nie die kerkraadsvergadering kan bywoon nie, moet u asseblief voor die tyd skriftelik verskoning maak.
3. Woon die ouderlingraadsvergaderings gereeld by.  Dis waar u u wyk met u leraar en mede-ouderlinge kan bespreek.
U diaken
1. U en u diaken vorm ‘n span wat saam die mense in u wyk moet bedien.  Handhaaf daarom ‘n goeie verhouding met hom.
2. Vra u diaken om elke maand by u besoek af te lê.  Hy kan dan nuus aan u meedeel, u kan u wykswerk bespreek en beplan en u kan ook na u wyk se dankofferbydrae kyk.