Ons wil ons kind doop. Wat moet ons weet?
Ons wil ons kind doop. Wat moet ons weet?
prof. Gerrit Smit
Die doop is een van die twee sakramente in die gereformeerde kerke.
WAT IS SAKRAMENTE?
Sakramente is heilige en sigbare tekens en seëls wat deur God ingestel is om daardeur die belofte van die evangelie (die verlossing in en deur Jesus Christus) nog verder aan ons te verduidelik sodat ons dit des te beter kan verstaan, en om ons daardeur te verseker dat ons werklik deel het aan dié belofte. So wil God deur die sakramente ons geloof versterk. (Vgl. HK antw. 66.) Die sakramente is dus tekens en seëls: As tekens wys dit heen na die gekruisigde liggaam en gestorte bloed van Christus en verduidelik dit verder die verlossing in en deur Jesus Christus aan my (sleutelwoorde in die formulier: net soos). As seël verseker dit my dat ek werklik deel het aan die verlossing van sondes deur Jesus Christus (sleutelwoorde: net so seker). Ons moet kyk na die tekens as die sakramente bedien word. God wil dat ons dit moet sien. Daarom word die sakramente sigbare tekens en seëls genoem. Daar is twee sakramente: Die doop en die nagmaal.
Die instelling van die doop
- Dit is deur Christus ingestel (Matt 28 : 19).
- Die doop as teken en seël:
Dit beteken: net soos (daarom is dit ‘n teken) en net so seker (daarom is dit ‘n seël), as wat water ‘n mens uiterlik skoon was van die vuilheid van jou liggaam, net so seker is ek as gedoopte skoon gewas met die bloed van Christus van my innerlike vuilheid, dit wil sê van al my sondes. - Die doop as belofte en eis:
Met die doop beloof: God die Vader aan ons dat Hy ‘n ewige genadeverbond met ons oprig en ons tot sy kinders en erfgename wil aanneem en alles vir ons ten goede laat meewerk; belowe God die Seun aan ons dat Hy ons was met sy bloed van al ons sondes; belowe God die Heilige Gees aan ons dat Hy in ons wil woon, ons aan Christus wil bind deur die geloof, die weldade wat Christus vir ons verwerf het tot ons eiendom wil maak en ons wil reinig en heilig om eenmaal onbevlek voor God te verskyn. - Deur die doop eis God van ons dat ons bogenoemde beloftes in die geloof moet aanneem; dat ons moet lewe in gehoorsaamheid aan God; dat ons Hom bo alles moet liefhê met ons hele hart, siel, verstand en al ons kragte, en dat ons in voorbeeld en in opvoeding hierdie liefde vir God, sy kerk en sy Woord vir ons kinders moet leer.
Wat moet ek doen as ek my kind wil laat doop?
Ons doop nie enige kind nie – hiervoor is die doop te heilig om sommer links en regs te bedien.
In die eerste plek is die doop ‘n verbondsteken. God se verbond word volgens die Skrif in die gesin voortgesit en deur die huwelik verseker. Indien ‘n man en vrou saam kinders het maar hulle is nie getroud nie, kan die kind nie gedoop word alvorens die ouderlingeraad ‘n deeglike ondersoek gedoen het wat die omstandighede is, of die paartjie van voorneme is om te trou en watter redes daar bestaan waarom die kind gedoop kan word nie. ‘n Paartjie wat saamwoon kan dus verwag dat die kerk sal versoek dat hulle eers trou voordat die kind gedoop kan word. Indien die paar nie van plan is om te trou nie, ontstaan die vraag waarom hulle dan ‘n kind wil doop? Is dit dan net ‘n gewoonte of bygeloof? Of verstaan hulle nie die doop reg nie? Die ouderlingeraad sal die paartjie in liefde begelei om die doop reg te verstaan.
Ons doop net lidmate se kinders – die ouderlingeraad moet toesig hou oor die doop.
Volgens die belydenis en die Skrif moet ouderlinge toesig hou oor die bedieining van die sakramente sodat dit nie ontheilig word nie. Om dié rede kan slegs belydende lidmate van die gemeente (of in hoë uitsondering – lidmate van Gereformeerde kerke met toestemming van hulle ouderlingeraad) kinders laat doop. Indien die vader of moeder van die dopeling nie ‘n belydende lidmaat is nie, kan slegs die vader/moeder wat wel ‘n belydende lidmaat is, die belofte voor die kansel aflê. Die kind kan wel in hierdie geval gedoop word. Indien die vader en moeder beide nie lidmate van die kerk is nie, kan die kind nie gedoop word nie. Een van die twee of beide sal eers belydende lidmate van die gemeente moet word, alvorens hulle kan aansoek doen om ‘n kind te doop.
Die doop vereis 3 beloftes:
In die eerste plek eis die doop dat die ouers die Bybel as die volkome leer van die saligheid moet bely en die belydenisskrifte moet erken as ‘n opsomming van die leer van die Skrif.
In die tweede plek word vereis dat verbondsouers hulle kind/kinders sal grootmaak ooreenkomstig die eise van God se Woord en in leer, lewenswandel en opvoeding die kind opvoed en laat opvoed ooreenkomstig die eise van dié Woord.
In die derde plek word vereis dat ouers die tug as kerklike liefdeshandeling moet onderskryf wat ook behels dat die kerk mede-verantwoordelikheid neem vir die opvoeding van die kind en dat die kerk ook toesig moet hou of die ouer die belofte wat gemaak is, gestand doen.
Om ‘n kind te laat doop is daar die volgende verloop of prosedures:
1. Meld aan by die leraar / ouderlingeraad indien u ‘n kind wil laat doop.
2. Gee ‘n afskrif van u huweliksertifikaat en die kind se geboortesertifikaat.
3. Maak seker dat een of albei ouers belydende lidmate van die gemeente is.
4. Maak seker dat u kerkbesoek getrou en meelewend is. Die ouderlingeraad kan besluit om u ‘n tydperk van 6 maande te gee voor die kind gedoop word om eers u kerkbesoek te monitor indien u nie ‘n getroue lidmaat is nie.
5. Reël ‘n doopgesprek met die leraar. Tydens hierdie gesprek sal ‘n geskikte datum bespreek word.
6. Reël met die kerkkantoor dat u die vorms invul en die dokumente op lêer kom.
7. Tydens die doopgeleentheid word die ouers na vore geroep. Al die kinders van die gesin is welkom om ook by die doopvont te kom staan want die hele gesin word voor God in die verbond ingesluit.