Ek is gekies as diaken. Wat moet ek weet?

Volgens Hand. 6:3, 1 Tim. 3:8-12; 1 Tim. 4:12 – “Uit die Bybel is dit duidelik dat ‘n ampsdraer bekend moet wees as iemand met ‘n lewende geloof, iemand met ‘n begeerte om vir die Here te werk, een wat bekwaam is om te onderrig, wat ook gewillig om daarvoor toegerus te word en wat die Heilige Skrif voortdurend ernstig ondersoek.  Verder moet ‘n ampsdraer “onberispelik wees, die man van een vrou, nugter, ingetoë, fatsoenlik, gasvry” (1 Tim 3:2), in alle opsigte betroubaar (Hand 6:3) en met die Gees van God vervul.”

In artikel 22 van die Kerkorde word oor die taak van die diaken die volgende gesê:

Die opdrag van die diaken is

“Die diakens moet getrou en ywerig die bydraes en goedere wat gegee word, versamel en bewaar.  Hulle moet ook nougeset sorg dat die middele tot ondersteuning van die armes gevind word.  Hulle amp behels ook die uitdeling, wat hulle met onderskeiding en versigtigheid moet nakom.

Verder is dit goed dat nie net met uiterlike gawes nie, maar ook met trooswoorde uit die Woord van God, aan die armes en noodlydendes hulp verleen word.  Die diakens moet die gemeente inspireer en aanspoor om mekaar se laste te dra en getrou te wees in die diens van barmhartigheid, in navolging van Jesus Christus, die Kneg van die Here, wat ons krankhede op Hom geneem en ons smarte gedra het (Jes 53; Mk 10:45).

Verder is die taak van die diaken om diens te verrig by die viering van die nagmaal en by die erediens.”

1. Woon getrou by.  Indien moontlik, sê asb. vooraf vir die leierdiaken indien u nie ‘n diens kan bywoon nie.  Ons begin 8:45 (oggend) in die konsistorie gereed maak vir die erediens.

2. Help met die opneem van die offergawes.  Tydens die eredienste word die offergawes voor die kansel gebring vir die dankgebed.  Elke diaken tel die ry mense waar hy die bordjie aanstuur en verstrek die totaal aan die verantwoordelike diaken wat die groottotaal in die konsistorieboek opteken.

3. Alle diakens help met die bediening van die Nagmaal, die voorbereiding van die tafel, en die opruiming na die tyd.  U moet ‘n uur voor die erediens by die kerk wees om te help met die voorbereiding.

4. Neem die pos in die wyksrakkie getrou.

1. U is verantwoordelik vir die onderlinge sorg in u wyk.  Besoek u wykslede maandeliks en bou so ‘n goeie verhouding met hulle op, sodat u op gereelde basis kennis kan neem van hulle wel en wee.

2. U is ook verantwoordelik vir die insameling van dankoffers in u wyk.  U ontvang elke maand een koevertjie vir elke besoekpunt in u wyk, wat u rondom die einde van die maand aan u wykslede oorhandig saam met ‘n kopié van Die Boodskapper.  Dit is hulle verantwoordelikheid om dié koevertjies tydens ‘n erediens in die kollektebordjie te gooi.

3. Tydens inbetaaldatums stel die kassier die koevertjies wat tot op daardie stadium ontvang is, beskikbaar.  U gee u lidmate se bydraes aan die kassier en teken daarby; die kassier gee vir u ‘n kwitansie sodat die lidmate kan sien dat hulle bydraes wel ontvang is.  U kontroleer terselfdertyd watter lidmate se koevertjies nog nie ontvang is nie, en volg dit op.

4. U vorm saam met u ouderling ‘n span wat saam die mense in die wyk moet bedien.  Handhaaf ‘n goeie verhouding met u ouderling.  Besoek hom elke maand sodat u die wyk met hom kan bespreek en u saam kan beplan.

5. Stel die leraar van die wyk dadelik in kennis van probleme, siekte of sterfgevalle.

6. In gevalle waar alimentasie nodig is, moet die leierdiaken daarvan in kennis gestel word. Dit is dikwels nodig dat die wyksouderling ook in kennis gestel word wie in die wyk alimentasie ontvang sodat hy sensitief kan wees daarvoor tydens besoeke en self kan help om toe te sien dat die gesin versorg word.

7. Hou u wyksinligting op datum.  Gee inligting i.v.m. nuwe intrekkers, wegtrekkers en verskuiwers (d.w.s. mense wat na ‘n ander adres in die gemeente verhuis het) by die kerkraad/skriba in sodat die rekenaardata opgedateer kan word.  Neem ook kennis van nuwe intrekkers van wie kennis kry.

1. Woon die kerkraadsvergaderings gereeld by.  As u dit nie kan bywoon nie, moet u asseblief voor die tyd skriftelik verskoning maak.

2. Lees u sakelys, notule en kommissieverslae goed deur aangesien dit op die kerkraadsvergadering as gelese beskou gaan word.  Onthou dit is vertroulik en nie vir ander lede van u gesin bedoel nie.

3. Woon die diakonievergaderings gereeld by.  Dis waar u u wyk met u leraar en mede-diakens kan bespreek.