Watter taal gaan ons in die hemel praat?

Watter taal gaan ons in die hemel praat?

prof. Gerrit Smit

Sefanja 3:9 sê almal sal “rein lippe ontvang”. Volgens Calvyn moet ons nie Sef. 3:9 verstaan in terme van taal nie, maar in terme van reinheid. Aangesien almal op een-of-ander wyse ‘n afgod het, is dit nodig dat God mense se lippe aanraak sodat hulle God in waarheid kan aanbid sonder om van Hom ‘n afgod te maak.

Sommige reken dat Paulus se verwysing in 1 Kor. 13:1 na “tale van engele” ‘n bewys is dat daar een taal in die hemel sal wees wat gelowiges sal gebruik om God te dien. As ons egter in ag neem dat Paulus dikwels metafore gebruik om sake te beskryf, kan dit hier in 1 Kor. 13 bloot verwys na “onbekende tale”.  

God kan met mense van alle tale kommunikeer. Dit is dus nie nodig om een taal in die hemel te hê nie. Ons sal egter volmaakte kennis hê so dit is nie onmoontlik dat God een taal beskik het wat vir almal verstaanbaar sal wees in die hemel nie. Ek dink elkeen sal eie taal praat in die lig van Openbaring 7:9 en 15:4 en ander plekke wat meld dat “nasies”, “volke” en “tale” in die hemel sal voortbestaan.