Wat gebeur met die siel as mens doodgaan?

Wat gebeur met die siel as mens doodgaan?

prof. Gerrit Smit

Jesus sê: Ek gaan na my Vader se woning – die hemelse woning – om vir jou plek gereed te maak. Dan kom Ek om jou te haal sodat jy ook kan wees waar Ek is.

Na jou dood sal jy dus wees waar Christus nou is sedert sy hemelvaart. Die dood beëindig dus nie jou bestaan nie, maar verander dit. Van die sigbare bestaan in ’n tasbare liggaam gaan jy oor na die geestelike sfeer, dit wat vir die oog onsigbaar is. Jy word nie iets anders soos ’n engel nie, maar bly ’n mens. ’n Mens egter in ’n ander bestaan met ‘n verheerlikte liggaam.

Ons glo dit gebeur nie “5 minute na die dood” soos in sommige gewilde boeke geskryf word nie, maar onmiddellik. Daarmee verwerp ons ook die gedagte dat ‘n mens se siel “slaap” in die graf tot en met die wederkoms (soos die Sewendedagse Adventiste leer). 

Die Bybel verduidelik dit in beeldspraak omdat dit vir ons menslike verstand op aarde nog onbegryplik is. Ons kyk nog net in die raaiselagtige spieël. Jou liggaam waarin jy nou is word voorgestel as ’n tent wat afgebreek moet word (2 Kor 5). Dit is ’n tydelike woonplek. Die woonplek word vervang met ’n hemelse woning, iets wat ewig bly staan.

Ons glo na die dood sal mense mekaar kan herken. Maar dan sal die band met God jou Vader sterker wees as jou bande met jou gesin. Daar sal geen gesinne wees nie. Daar word nie meer getrou nie. Huwelike is iets van hierdie wêreld. Daarom moet ons ons verlange op God rig en nie op die weer sien van ons geliefdes nie. Nee, die vreugde sal wees om in een groot gesin as kinders van God saam te wees. Dan sal die volheid van God se volmaakte skepping weer herstel wees. Dan sal die angel van die dood, die sonde, vir ewig verwyder wees. Ook Satan wat mag gehad het oor die dood sal vir ewig vernietig wees. Die dood en die doderyk sal in die ewige poel van vuur gewerp wees. Wees dus getroos deur die waarheid soos ons dit bely in Heidelbergse Kategismus Sondag 22: Ek glo dat my siel na hierdie lewe dadelik tot Christus, sy Hoof, opgeneem sal word, maar ook dat hierdie selfde liggaam van my, deur die krag van Christus opgewek sal word.