Homoseksualiteit

Homoseksualiteit

Prof. Gerrit Smit

Homoseksualiteit word gesien as die geslagsgemeenskap of intieme verhoudinge van persone van dieselfde geslag, ‘n man met ‘n man en ‘n vrou met ‘n vrou.  Ten opsigte van vrouens word dit ook lesbianisme genoem.  Hierdie praktyke staan teenoor die skeppingsorde soos wat God dit ingestel het.  Hy het aan die man ‘n vrou gegee (Gén. 1:27; 2:22-24) om by hom te pas en sy eweknie te wees.  Alleen van hierdie twee (man en vrou) word gesê dat hulle een vlees sal wees (Gén. 2:24).  Dit beteken seksuele eenheid.  Hierdie verhouding word ‘n heteroseksuele verhouding genoem.

Wat sê die Skrif van homoseksualiteit?

• Lev. 18:22 Met ’n manspersoon mag jy ook geen gemeenskap hê soos ‘n mens met ‘n vrou het nie.  Dit is ‘n gruwel.
• Lev. 20:13 En as ‘n man met ‘n manspersoon gemeenskap het soos ‘n mens met ‘n vrou het, het hulle altwee iets gruweliks gedoen.  Hulle moet sekerlik gedood word.
• Rom. 1:26,27 Daarom het Gog hulle oorgegee aan skandelike hartstogte, want hulle vroue het die natuurlike verkeer verander in dié wat teen die natuur is; en net so het ook die manne die natuurlike verkeer met die vrou laat vaar en in hulle wellus teenoor mekaar ontbrand: manne het met manne skandelikheid bedrywe en in hulleself die noodwendige vergelding van hulle dwaling ontvang.
• 1 Kor. 6:10 Moenie dwaal nie!  Geen hoereerders of afgodedienaars of egbrekers of wellustelinge of sodomiete … sal die koninkryk van God beërwe nie.

Wanneer die “huwelik” tussen homoseksuele ter sprake kom, moet ons besef dat die Woord van God sodanige verbintenisse totaal verbied.  Voetius het gesê dat God nie wil hê dat gelowiges met onheiliges en veragters van sy verbond moet trou nie, maar vermaan ons om “in die Here” te trou (Deut. 7:4; 1 Kor. 7:39).  Ons moet dus besef dat die huwelik nie los staan van God se verbondseise en verbondsbeloftes nie.  Juis daarom mag die kerk nooit ‘n huwelik bevestig wat in stryd is met God se verbond – sy opdragte in sy Woord – nie.  Homoseksualisme is in stryd met die Skrif en daarom is so ‘n “huwelik” Bybels gesien, verbode.

Die kerk veroordeel egter nie homseksuele persone nie, maar veroordeel wel die sonde op grond van die Skrif. Alle mense is sondaars, en as ‘n mens bewus is van ‘n sonde in jou lewe, moet jy aktief daarteen stry, en dit nie wegredeneer, met allerhande slim redenasies probeer goedpraat of kwaad word as iemand jou tereg wys nie. Ook teenoor die homoseksuele het die kerk ‘n bepaalde verantwoordelikheid.  Net soos enige ander persoon wat in ‘n sonde verval het, moet daar met groot deernis, maar ook met besliste vermaning teenoor hierdie mense opgetree word.  Die Bybelse weg van bekering, berou en ‘n staak met die sonde moet duidelik aan hulle uitgewys word.  Indien daar egter volhard word in die sonde word daar, net soos met enige ander lidmaat, met die tug opgetree.