Vergifnis

Vergifnis

prof. Gerrit Smit

In die Bybel word heelwat oor vergifnis geleer. Die boek Filémon handel hoofsaaklik oor hoe ons as Christene iemand moet hanteer wat teenoor ons oortree het. Lees dit gerus. Een vraag wat met vergifnis te doen het, is die vraag: hoekom is die wêreld so vol sonde? Toe die Here die aarde gemaak het, was alles dan só goed en mooi (Gén. 1:31). Ja, ook die skepping van die mens was goed en mooi. Die verdorwenheid van die mens kom dus nie uit die skepping nie, maar moet op ‘n ander plek gesoek word. Ons hoef egter nie te wonder waar al die onreg op die aarde vandaan kom nie. Dit kom uit die mens, ja, uit sy hart. Jakobus leer: Moenie dwaal nie (Jak. 1:16) – sonde kom uit die hart en as dit vertroetel word, mond dit uit in dade. Die mens het deur sy eie sonde die rein skepping kom besoedel. Die Skrif leer ons in 1 Johannes 1:8-10 dat daar vir ons ‘n uitkomkans is – bely die onreg! Wanneer ons ons sonde bely, is Hy getrou en regverdig om dit te vergewe, leer vers 8. As Christus ons vergewe het, moet ons mekaar vergewe.

Sondevergifnis kan nie van een kant af kom nie. Die mens moet waak daarteen om die genade van die Here te wil toe-eien en die vergifnis te wil omhels, sonder om die vergifnis horisontaal uit te deel na die medemens. Soos Christus vergeef het, moet julle ook vergeef, leer die Woord. As jy dit regkry om te vergewe, het jy die bewys van God se genade in jou lewe (Heidelbergse Kategismus, Sondag 51, vraag 126). God gee sy genade aan die sondaarmens wat sy lewe aan God verskuldig is. Dit gee jou die krag om vanuit die genade te kan leef in vergifnis. 

In Mattheus 18:15-35 leer Jesus dat ’n mens oor vergifnis nooit in terme van getalle moet dink nie. Jy moenie boekhou van vergifnis nie. Want God het nie van jou sonde boekgehou nie. Hy het sy Seun gegee in jou plek sodat al jou sondeskuld afgeskryf kon word. Hy wil hê dat daardie daad van vergifnis nie net jou kaartjie hemel toe sal verseker nie, maar dat dit iets van die hemel in jou hart sal tuisbring. Dat jy vir ander mense wat in die skuld is ’n stukkie hemel sal laat ervaar. Om te vergewe sonder om boek te hou. Dit is die heel grootste en swaarste les om te leer. Vergifnis is nie ’n prestasie nie. Dit is ook nie ’n gedeeltelike kwytskelding nie. As ’n mens vergewe, is dit sonder voorbehoud en sonder voorwaardes. Vergifnis maak ’n mens bankrot. Nie noodwendig bankrot aan rande en sente nie, maar bankrot aan eiegeregtigheid en selfhandhawing.